EDITORYAL — Nausab na si Gringo?

Miawhag si kanhi Sen. Gringo Honasan ngadto sa katawhang Pilipinhon nga maghiusa na alang sa kalambuan sa nasud.

Naglingo-lingo ang pipila ka mga tigpaniid apan ilang gihangop ang panawagan ni Honasan.

"Maayong tilimad-on kini kay mipakita si Honasan nga nausab na siya...ug dili na siya maong Honasan nga nimugna og kagubot sa nasud," suma pa sa usa ka beteranong tigpaniid sa politika.

Naleksiyon na tingali si Honasan gumikan sa iyang pagpangu sa mga napakyas nga kudeta diin misaka na unta ang ekonomiya sa nasud apan nahisukamod nasad kini dihang nisuway siya sa pagtumpag sa gobyerno pinaagi sa usa ka kudeta.

Maayo unta. Maayo unta kon nausab na ang baruganan ni Honasan. Baruganan nga palambuon ang nasud pinaagi sa panaghiusa sa mga Pilipino ug dili pasukamuron na usab pinaagi sa kudeta.