Naa pay dispatser

Hangtod karon naa pa gihapoy mga dispatser nga nag-operate sa kadalanan sa dakbayan sa Sugbo. Ang uban mikalma ug mihunong na. Posibleng nagpalinaw-linaw lang una. Nagpakahilom samtang init pa ang panahon. Apan naa gyoy ubang mga dispatser nga nagpadayon sa ilang binuang hangtod karon.

Naay dispatser diha sa eskina sa Manalili ug Osmeña Blvd. nga maro kaayo. Nagplantalya lang siyag pamaligyag pliers aron dili mabisto ang matuod niyang modus operandi. Mosugat siya sa mga PUJ ug mopasumangil og hanyag sa iyang baligya ngadto sa driver. Pero bisan dili mopalit ang driver, mangayo gayod siyag delihinsiya. Daghang mga driver ang nagbagulbol sa gibuhat niining tawhana.

Dugang niini, usa ka magbabasa niining lindog mi-text nga nagkanayon: "Samok kaayo kanang mga dispatser diha duol sa may Happy Herbs atbang sa Mabolo Police Station." -- 0926-8199841 (August 5, 2006 -- 18:11:13)

* * *

Wala ko masuheto dihang dapita. Pero kon tinuod nga ang maong mga dispatser naa gyod sa atbang sa Mabolo Police Station, siyaro na man sab wala gayod makamatikod ang kapolisan nianang kalihokan sa maong dispatser? Haskang paita! Wala gyod kaha sila makabantay sa maong mga dispatser maong wala sila makabadlong? O basin mangatarongan lang sila nga wala silay katungod pagbadlong niana kay bulohaton na kana sa mga traffic police.

Maayo unta nga mabadlong na kanang maong mga dispatser. Pagka wala god nilay batasan! Naa pa gyod sila magdispats atbang sa usa ka police station? Mapangahason gyod kanang mga tawhana.

* * *

Duna gyoy tawo nga badlongon nga malipay kon makapadala silag malisyosong text messages ngadto sa laing tawo. Usa na niini ang tag-iya sa cellphone number 0920-2380706. Niadtong Agosto 3, 2006, may mireklamo kay gipadad-an og malisyoso ug makadisturbo nga text niining maong numero sa cellphone.

Akong tambag nga kon makadawat kamog malisyosong text gikan sa maong cellphone number, ayaw lang ninyo basli. Daghan tingali siyag load.

* * *

(Sumbong ug reklamo? Text sa 0910-8105522)