Gubaon nga cellphone

Ang usa sa atong mga magbabasa nga tag-iya sa cellphone number 0919-5132803 mi-text kanako aron pagtaho sa iyang kasinatian sa iyang pagpalit og cellphone. Ang iyang gireklamo kay gubaon ang cellphone nga iyang napalit sa tindahan kansang ngalan nagsugod sa letrang O ug nagtapos sa letrang S.

Gihukman ko nga inisyal lang una ang akong ihatag kaninyo sa ngalan sa maong tindahan in fairness usab sa tag-iya niini. Gireklamo sa atong texter ang maong tindahan tungod kay pirme lang siyang baligyaan og gubaon nga cellphone.

Matud pa sa atong texter, kanapulo na siya nagbalikbalik sa maong tindahan tungod kay gubaon ang cellphone nga iyang napalit. Sanglit nakasakay pa man sa warranty period, iya kining gipailisan. Pero ang nakadaot kay gubaon man gihapon ang cellphone nga giilis sa maong tindahan ngadto kaniya.

"Nahasol na ko kaayo niini," nagkanayon ang atong texter.

Mao kini nakadaot sa ubang mga tindahan kay dili magtarong sa ilang serbisyo ngadto sa mga pumapalit. Nganong ibaligya pa man ang cellphone nga gubaon ug dili na kapahimuslan sa makapalit. Mora man sab og may lama sa pangilad kining maong estilo. Awhagon nako ang atong texter ug ang uban pang nakasinati og ingon niini nga i-refer ninyo kini ngadto sa DTI kay nagtuo ko nga may mahimo ang maong buhatan sa ingon niini nga sitwasyon.

* * *

Sa laing bahin: "Bahin sa Laray San Roque, wa ko makasabot diha. Way mga tanod. Kon naa man gani, way pagpakabana nianang trapiko nga naghuot. Naay traysikad nga modutdot sa jeep nga pasaheroan. Mag-double parking pa, maglisod og agi ang ubang sakyanan." -- 0927-3187178 (June 19, 2006-14:15:13)

Salamat sa imong pahibalo. Hinaot unta nga mokooperar ang mga tanod diha sa Laray San Roque ug ilang buhaton ang ilang katungdanan. Hinaot usab unta nga mabadlong na kanang badlongong mga traysikad drivers dihang dapita nga makahatag og kahasol sa kadalanan.

* * *

(Sumbong ug reklamo? Text sa 0910-8105522)