Way batasan

Human mopadayag sa ilang awhag ang mga opisyal sa Estados Unidos ngadto ni Presidente Arroyo nga libkason na ang Proclamation 1017 nga nagdeklarar sa nasud ubos sa state of national emergency, tulin pa sa manatad si Arroyo nga mihimo og public address pinaagi sa telebisyon network nga iya sa kagamhanan.

Sa iyang public address, si Arroyo miingon nga andam na niyang ilibkas ang proklamasyon apan iya una nga gipangayoan og rekomendasyon ang mga opisyal sa militar ug kapolisan lakip na si Defense Secretary Avelino Cruz.

Matud niya nga kon irekumendar sa maong mga opisyal nga wa nay piligro ug mamahimo nang libkason ang proklamasyon iya dayon kining gihimo. Ang tinuod dugay rang nasayod si Arroyo nga wa gyud kinahanglana ang iyang proklamasyon, apan aron pagdismolar sa iyang aksiyon iyang gipangayoan kunohay og report ang defense department.

Pero ang tinuod mga higala, si Arroyo nahadlok sa Amerika hinungdan nga dali kini nga nakahimo og public address. Bisan tuod og di maayo ang implikasyon niini sa atong "sovereignty" isip usa ka nasud, apan dako ni og gikatabang aron mabalik sa normal ang sitwasyon sa atong nasud.

Subo hinuon nga paminawon nga ang mga militanteng grupo miingon na nga bisan pa og libkason sa presidente ang proklamasyon magpadayon sila sa ilang protesta.

Ambot og unsa ba gyuy tuyo niining maong mga tawo nga magpunay man og samok samok sa atong panggobyerno? Sa pagkatinuod mga higala usa sa mabasol sa kahimtang sa atong ekonomiya mao ang mga militanteng grupo nga magsigi og welga bisan og way angayan nga welgahan.

Ang pagpunay nila og himo og welga maoy hinungdan nga maapektuhan ang atong stock market ingon man ang bili sa piso. Tinuod dunay mga kakuwangan ang atong gobyerno, apan inay nga atong tabangan ato man hinoon nga gisamutan pinaagi sa paghimo og way hinungdan nga mga protesta.

Samtang manaway ta sa gobyerno nga nag-abusar sa ilang gahom, di nato sila hatagan og rason nga mohimo sa ingon pinaagi sa pag-abusar pod nato sa kagawasan nga gihatag kanato. Alang nako usa na ka pag-abusar sa atong katungod ang pagpadayon sa mga protesta bisan og wa nay basihanan.

* * *

Mao nga usahay di sab nato mabasol ang gobyerno labi pa ang militar kon dunay mga sakop sa militanteng grupo nga mabun-og atol sa mga rally tungod kay sila mismo manghagit man sa awtoridad ug ang uban wa gyuy batasan.

Personal nako nga naobserbahan ang pagka way batasan sa pipila ka mga miyembro sa militanteng grupo atol sa forum didto sa IBP social hall niadtong Miyerkules sa hapon. Samtang nagsulti si Gen. Orlando Ambrocio ang deputy commander sa Central Command natugaw kini sa dihang kalit nga namarog ang mga sakop sa militanteng grupo og mitalikod aron ipakita sa heneral ang marka sa ilang luyo nga nanawagan pagsupak sa Proclamation 1017 ug sa pagpalagpot ni Arroyo.

Di kini angayang buhaton sa usa ka disente ug edukado nga tawo. Ambot og wa ba sila tudlo-i sa maayong pamatasan sa ilang mga ginikanan nga kon dunay magsulti angayang paminawon. Gawas pa bisita si Ambrocio sa maong forum isip usa sa ilang mga dinapit nga resource speakers.

Wa kong kaantos hinungdan nga akong giduol si Armand Perez og akong gihangyo nga badlongon ang gihimo sa iyang mga kauban. Apan igo lang ko nga giingnan ni Perez nga pasagdan lang kay kini paagi sa ilang expression.

Tinuod way nagpugong nila sa paghimo sa ingon kay ila kining katungod, apan makahimo man sila sa pagpadangat sa ilang sentimento nga pinasubay sa maayong pamatasan.

* * *

[email protected]