Dili para bugas

Nagpakisayod ang konseho sa dakbayan kun angayan pa ba nga padayonon ang paghatag og financial assistance ngadto sa kabarangayan kabahin sa Oplan Pakigsandurot.

Ang akong ikasulti mao nga angay'ng hatagan gihapon kadtong mga barangay nga aktibo sa ilang kalihukan pagpatunhay sa kahusay ug kalinaw, apan ang uban maayong hunongon na.

Ang gipasabot nako nga "uban" mao kadtong mga barangay kang kansang mga opisyal nangayo og financial assistance niadtong Disyembre apan para lang sa sinakong bugas.

Pagka law-ay paminawon. Samtang ang uban nangayo og kahimanan nga magamit nila sa pagpalambo sa ilang serbisyo apan kamo bugas ang inyong gipangayo.

Ayaw ko'g ingna nga wala na mo'y bugas? Bitaw, uniporme sa inyong mga tanod, kahimanan sa tanod sama sa posas, sakyanan nga gamiton sa pagpatrolya, walay problema.

Apan bugas? Porbida, law-ay g'yod kaayo. Ang tanang barangay employees nga naglakip sa tanod ug mga appointed officials gipanghatagan og tag-usa ka sakong bugas-humay sa miaging pasko, wala pa kamo makontinto?

Gani daghang barangay nga wala intawon makapahimulos sa hinabang gikan sa Oplan Pakigsandurot.

* * *

Usa sa angay'ng hatagan og pagtagad sa City Hall mao ang pagpadali nga mapagawas na ang natanggong nga city share sa mga sakop sa Lupong Tagapamayapa sa kabarangayan.

Sa among barangay sa Lorega-San Miguel, ang mga sakop sa Lupon nagdawat lang og tag P100 ang buwan isip honoraryom nga ihatag og tiningob matag unom ka buwan.

Malipay na intawon sila kon makadawat og city share nga honoraryom nga tag P900 ang buwan, apan nalangan ang pagpagawas sa maong City Hall incentive alang sa mga buwan sa Oktobre, Nobyembre ug Disyembre.

Hilabihan kakapoy sa trabaho sa Lupon, ilabi na niadtong mga barangay nga daghan kaayong lumulopyo nga mga burokento kaayo nga pagkatawo, sama sa Lorega.

Ang paghatag sa City Hall og dugang incentive makapadasig pagsamot sa mga Lupon sa ilang serbisyo.

Pinaagi sa mga sakop sa Lupon, daghang mga kaso ang dili na moabot diha sa hukmanan.

* * *

Daghang mipadala nako og text message nga gusto ko nila nga patubagon sa ilang pangutana. Ayaw tawon, kapoy na kaayo nga anha ko ninyo patubaga sa text.

Ang usa ka isyu nga inyong ipangutana kanako nagkinahanglan og taas nga tubag. Tawga lang ko kon gusto kamo nga mangutana, labi na sa uban nga buot masayod kabahin sa armas.

Ang uban usab, nagpakisayod kabahin sa mga punto-legal. Basin nagtoo kamo nga abogado ko ha? Dili ra ba ko abogado.

Nasayod lang ko og gamay kay tigbasa man ko og mga balaod, ingon man senior reporter ko sa The Freeman nga anaa madistino sa court.

Apan nalipay ko nga sari-sari ang inyong buot mapakisayran nako, apan sorry lang nga dili ko makatubag ninyo sa text. Mao bitaw nga si Randy sa Danao mipadala na lang og "load" nako kay dili kaayo ko motubag sa text.

Apan kon ang inyong mga reklamo matimbang-timbang nako nga angay'ng hatagan og diha-diha nga pagtagad, ako ra kana nga ipublikar ug tubagon.

* * *

Kadtong dunay ireklamo sa Renbor Patrol, ipadala lang sa 0917-383-6645.