Pacman gamiton?

Ang labing dakong garantiya nga malup-og dayong nasudnong panaghiusa nga nituyhakaw uban sa kadaogan ni Manny "Pacman" Pacquiao mao ang pagkabayo sa mga politiko. Una ning nabantayan dihang nangatkat dayon sa ring sa Thomas and Mack Center sa Las Vegas silang First Gentleman Mike Arroyo ug Ilocos Sur Governor Chavit Singson pipila ka gutlo human sa makapakugang nga kadaogan ni Pacquiao batok ni Erik "El Terrible" Morales.

Nasamotan dihang nakig-istorya si Pres. Arroyo kang Pacquiao pinaagi sa telepono atubangan sa mga kamera sa ABS-CBN ug Solar Sports. Tungod tingali sa kadako sa tentasyon pag-ambit sa kahumot sa mananaog, wa nay nakahunghong sa presidente nga ang pagpabati sa iyang tingog sa telepono ngadto sa tibuok kalibotan maoy labing epektibong pahinumdom sa tanang hingtungdan sa iyang tingog sa "Hello Garci" tapes ug nga wa pa katak-opi ang kontrobersiya.

* * *

Pero kon tinuod nga dako kaayong ilang amot paghakot sa dakong delegasyon sa mga kadugo ug mga dumadapig ni Pacquiao ngadto sa Las Vegas, sa way paghisgot sa ilang pagpangu sa mga politiko nga nanung og sugal ug nipabaha sa pusta nga nakahimong inilog ni Pacquiao dayong sugod sa away (manghinaot lang ta nga di 'to pork barrel o kabahin sa koleksiyon sa expanded value added tax ang ilang giwaldas-waldas), katungod sa bana sa presidente ug ni Singson ang pagbinastos pagbawi sa ilang puhonan pinaagi sa pagtiti sa tanang kahigayonan nga mabantang sa mga kamera.

Labaw nang ikapasabot sa presidente ang iyang pakig-istorya ni Pacquiao kay ang-ang man kon si Susan Roces o si Cory Aquino ang mosakmit sa katungod pagpahalipay sa boksidor sa ngan sa mapasalamatong nasud ug katawhan. Gawas pa, nahibawo tang tanan nga labaw sa pakig-istorya ni Pacquiao, nga mahimo unta bisan silang duha ray makadungog, mao ang mas dakong tinguha pagamit sa kadaogan ni Pacquiao pagsagang sa seryusong mga hagit sa iyang liderato.

* * *

Ang bisan unsang pagduda sa motibo sa presidente pagsikit ni Pacquiao napapas sa iyang pagtandi sa iyang kaugalingon ngadto sa boksidor. Matod niya ang pagtimbakuwas ni Pacquiao gikan sa kapildehan maoy makadasig niya pagpadayon pag-alagad sa katawhan bisan sa padayong pagkuwestiyon sa kaligdong sa iyang mandato.

Morag layo ra sa tinuod ang pangangkon sa presidente. Lahi niya, way namasangil ni Pacquiao nga nanikas, daghan man ganing nagtoo nga si Pacquiao ang gitikasan ni Morales sa una nilang panagsangka niadtong Marso. Mahimo bang tambagan ang presidente nga igo nang iyang pagpahalipay ni Pacquiao?

Nabun-og nang daan si Pacquiao pagpukan sa garbo sa Mexico, mamugos pa ba gyong presidente nga, sama sa nagupok nga dagway ug gusok ni Morales, mawatas-watas sang kadungganan ni Pacquiao tungod sa imposibleng tahas pag-absuwelto niya?