Tamsi, Camacho miagak sa Cebu batok Quezon sa MPBL

CEBU, Philippines — Si Al Francis Tamsi mipabuto og 25 puntos samtang si Simon Camacho mipasud og krusyal nga layup sa hilimatyong segundos aron aswaton ang Cebu Greats ngadto sa kulbahinam nga daog batok sa Quezon Huskers, 80-79, sa Maharlika Pilipinas Basketball League (MPBL) Season 8 niadtong Lunes, Agosto 8, didto sa Mandaluyong City College of Science and Technology Gym.

Si Tamsi, nga milansang og pito sa siyam niya ka 3-pointers, mitak-op sa impresibo niyang salida pinaagi sa pagpasa og maanindot kaayong assist nga nahimong bantawan sa pagkamabayanihon ni Camacho. Ang Greats nabiyaan og 11 puntos sa first half ug alkansi gihapon og nuybe puntos, 68-77, sa pinal nga kuwatro minutos apan si Tamsi miposa og hagpok kaayong tres nga maoy nagpasilaob sa mainit nga pagbalitok sa Cebu sa naghinapos nga bahin sa duwa. Sila si Mark Meneses, Simon Camacho, ug Limuel Tampus misalida sab dayon sa wala pa si Camacho mipalabaw sa Cebu og usa ka lugas, 80-79, sa katapusang 45 segundos nga mao na diay ang pinal nga resulta. Si Meneses miposte og double-double 11 puntos ug 14 ka rebounds, samtang si Camacho mitapos uban ang siyete puntos, walo ka rebounds, ug upat ka steals.

Sila si Tampus ug Camillus Altamirano parehong mi-iskor og otso puntos samtang si Wowie Escosio miamot og 10 puntos alang sa Cebu nga milayat og balik sa kinatas-ang dapit sa South Division standings bitbit ang 17-5 rekord.

Si Cedric Manzano mitali og 17 puntos ug walo ka rebounds samtang sila si Joshua Yerro ug Chris Lalata nagkumbinar og 21 puntos apan sa way kapuslanan gumikan kay ang Quezon natagak sa 14-3 human napakgang ang unom ka sunod-sunod nilang daog.