Brgy. Officials pahataga'g SRI

CEBU, Philippines — Gisugyot sa Mandaue City Council ang paghatag og Service Recognition Incentive (SRI) alang sa mga kwalipikadong barangay kapitan ug konsehal sa barangay nga nakaserbisyo og tulo ka sunod-sunod nga termino.

Si City Councilor Dante Borbajo kinsa nisumiti sa ordinansa nagkanayon nga hatagan og P50,000 ang mga barangay kapitan ug P25,000 ang mga konsehal sa barangay.

Apan ang mahimong kwalipikado lang mao ang mga opisyal nga nakakompleto sa tulo ka termino nga walay interruption.

Gipasabot sa konsehal nga adunay mga opisyal sa barangay nga adunay interruption sa ilang mga termino diin dili kini mahimong makabenepisyo sa maong insentibo.

"Kana rang straight atong mahatagan", matud ni Borbajo.

Matud ni Borbajo nga ang SRI usa ka paagi sa pagpasalamat ug paghatag og pag-ila sa dugay’ng  serbisyo sa mga opisyal sa barangay.

Nagpasalamat si Borbajo kang Mandaue City Mayor Thadeo Jovito "Jonkie" Ouano sa pagsuporta sa maong sugyot.

Matud usab ni Borbajo nga ang pundo alang sa SRI kuhaon gikan sa general fund sa siyudad.

Gilaoman sa konsehal nga mapatuman ang Service Recognition Incentive sulod niining tuiga. BDB BANAT NEWS