Fetus bumara sa sewage facility ng condo

MANILA, Philippines — Isang patay na fetus ang natagpuan sa sewage facility ng isang condominium sa Barangay San Jose, Tagaytay City, noong Biyernes ng gabi.

Batay sa ulat, alas-6:59 ng gabi noong Biyernes nang madiskubre ng isang empleyado ng Cityland Condominium ang fetus na nakabara sa sewage strainer sa basement ng gusali.

Hindi pa tinukoy ng pulisya ang kasarian o tinatayang edad ng fetus.

Pinaniniwalaan ng pulisya na maaaring itinapon ang fetus sa drainage system ng isa sa mga residential unit ng condominium bago ito napunta sa sewage facility.

Patuloy na nirerebyu ng mga otoridad ang kuha ng mga CCTV camera at nagsasagawa ng masusing imbestigasyon upang matukoy ang posibleng sangkot sa insidente.

Isinailalim na sa wastong disposisyon ang fetus na ipinagkatiwala sa isang punerarya.