Lancers milampaso sa Fighting Maroons

CEBU, Philippines — Ang four-time defending champion University of the Visayas (UV) Green Lancers milampornas sa University of the Philippines (UP) Cebu Fighting Maroons, 94-65, alang sa una nilang daog sa Cebu Schools Athletic Foundation, Inc. (CESAFI) Season 26 basketball tournament niadtong Domingo, Septiyembre 13, sa Cebu Coliseum.

Si Raul Gentallan mipabuto og 25 puntos uban ang tulo ka rebounds, unom ka assists ug upat ka steals samtang si Kent Ivo Salarda midugang og 14 puntos, tulo ka rebounds ug usa ka steal alang sa Lancers, nga dali nakabawi sa makapakurat nilang kaparotan sa mga kamot sa University of San Carlos (USC) Warriors, 68-81, sa una nilang duwa niadtong Agosto 30.

Dako sab og naambag si AJ Sacayan uban ang 13 puntos, duha ka rebounds, duha ka assists, tulo ka steals ug duha ka blocks samtang si John Paul Bautista mitampo og 11 puntos alang sa Lancers, nga milusad og eksplosibong opensiba sa second half aron ilubong ang Fighting Maroons og 29 puntos.

Ang Lancers labaw lamang og usa ka lugas sa halftime, 45-44,  apan mitagak og 26-9 nga bomba sa ikatulong kuwarter aron pag-establisar og 71-53 nga bentaha, nga ila pang giinat ngadto sa 31 puntos sa naghinapos nga bahin.

Si Raul Gilbuena mihipos og 13 puntos sa Fighting Maroons nga nasugamak sa ikatulong sunod-sunod nga higayon.

Sa laing sangka sa kolehiyo, si Jhoernel Tangkay miharos og 25 puntos, unom ka rebounds,  duha ka assists, unom ka steals ug duha kablocks aron ituboy ang USC Warriors ngadto sa 77-63 nga pagpakaging sa  University of Southern Philippines Foundation (USPF) Panthers.

Ang Warriors alkansi og dos puntos, 53-55, human sa tulo ka kuwater apan gisirad-an nila ang duwa pinaagi sa nagkayong 24-8 rally aron patikalbongon ang Panthers.

Si James Tawacal mitali og 12 puntos ug pito ka rebounds samtang sila si Rey James Enriquez ug James Paolo Gica mi-iskor og 10 puntos matag usa lang sa Warriors nga nagkupot na karon og 2-1 rekord.

Si Peter John Peteros mikadlit og 18 puntos samtang si Lloyd Amadeo Gutang adunay 13 puntos alang sa Panthers nga nagahba sa 1-2.

Sa juniors division, ang University of San Jose-Recoletos (USJ-R) Jaguar Cubs midemolis sa Cebu Eastern College (CEC) Dragons, 73-44, sa usa ka engkwentro tali sa way pilding mga teams.

Sila si Japhet Sedrome ug John Gregory Carecosa nagkumbinar og 28 puntos, siyam ka rebounds, tulo ka assists ug lima ka steals alang sa dominante kaayong Jaguar Cubs, nga sa usa ka higayon miabante og 33 puntos.

Si Jhun Miguel Telmo mipupo og 11 puntos, upat ka rebounds ug duha ka steals sa dihang ang Jaguar Cubs miinat sa perpekto nilang sinugdanan ngadto sa 3-0.

Si Cedric de la Rosa mirehistro og double-double nga 11 puntos ug 11 ka rebounds uban ang tulo ka assists ug unom ka steals apan sa way kapuslanan gumikan kay ang Dragons nahagba human nakasagunson og duha ka daog.

Sa laing resulta, ang Cebu Institute of Technology-University (CIT-U) Junior Wildcats mikastigo sa University of Cebu (UC) Junior Webmasters, 79-65, alang sa una nilang daog.

Si Mark Ivan Geraldez maoy nangu sa CIT-U bitbit ang 15 puntos, duha ka rebounds, tulo ka assists ug upat ka steals.

Sila si Vincent Zamora ug Theo Maxim Santiago parehong mikulit og 13 puntos samtang si Geoffe Vhon Partosa mikolekta og 11 puntos, lima ka rebounds, unom ka assists ug upat ka steals alang sa Junior Wildcats, nga sa usa ka okasyon nakabentaha og 34 puntos nga nakapabarag sa Junior Webmasters sa nahibiling bahin sa duwa.