Inihan nga mobisita sa anak nasakpang nagdaka og shabu sikop
CEBU, Philippines — Nasikop sa Guadalupe Police Station ang usa ka 51-anyos nga inahan human nadiskubrehi ang usa ka paketeng shabu nga gitago sulod sa bra niini atol sa iyang pagbisita sa iyang anak diha sa Operation Second Chance facility sa Barangay Kalunasan, Dakbayan sa Sugbo niadtong Lunes.
Ang nasikop mao si Jacqueline Tingal Artajo alyas “Jacky”, residente sa Bato Carbon, Barangay Ermita, niining siyudad.
Base sa taho sa kapolisan, nahitabo ang pagkasikop samtang gipahigayon ang Standard Operating Procedure (SOP) alang sa mga mobisita sa pasilidad.
Matud sa suspetsado nga ang iyang anak nakahimo og kalapasan sa Section 5 Article II sa Akta Republika 9165 kun “Comprehensive Dangerous Drugs Act of 2002” niadtong Septiyembre sa niaging tuig hinungdan nga anaa kini karon diha sa nahisgutang pasilidad.
Ang suspetsado nangangkon nga nakainom siya sa niaging gabii ug nagdali-dali og adto sa pasilidad human makadawat og tawag nga makagawas na ang iyang anak.
Giangkon usab niya nga iyaha ang maong shabu ug tiggamitan siya niini pawala sa kakapoy.
Sa pagkakaron, anaa kustodiya sa Guadalupe Police Station ang suspetsado. — Paul Benedict O. Sariana, Cheny R. Labrador (BANAT NEWS)
- Latest
