Construction firm, kinasuhan sa piskalya
Gumiba sa satellite office, covered court
MANILA, Philippines — Sinampahan na ng kaso ng Manila City Government sa Office of the Prosecutor ang isang construction firm na gumiba sa satellite office ng Manila City hall at covered court ng Rizal Avenue Sports Athletics Complex (RASAC) ng walang pahintulot mula sa LGU.
Ayon kay Manila Mayor Francisco “Isko Moreno” Domagoso ang pagsasampa ng kaso laban sa Jelsie Construction and Supply ay kasunod ng isinagawang “illegal” demolition sa satellite office, day care, evacuation center, isolation facility, at community hub ng lungsod.
Kabilang sa mga isinampang kaso ay Malicious Mischief na pinanumpaan ni Thelma Perez ng General Services Office; Unlawful Demolition and Construction, na inihain nina Juanito Cunanan, ng Enforcement Division ng Office of Building Official at City Engr. Armand Andres at Unauthorized Taking of Government Facility ni Director Arnel Eustaquio Angeles ng Manila Disaster Risk Reduction and Management Office.
Lumilitaw sa reports na tinatayang aabot sa P10.4-M ang book value ng ginibang pasilidad habang nabunyag sa record ng Department of Public Works and Highways (DPWH) North Manila District Engineering Office na nasa P145.5-M ang “Multi-Purpose Building, Sentro Komunidad de Santa Cruz, Manila (Phase 1),” na itatayo at nai-award sa Jelsie Construction sa pamamagitan ng Notice of Award noong May 22, 2025. Walang koordinasyon sa LGU.
Napag-alaman din na nakakuha ng mahigit P1.43-B na flood control projects ang naturang contractor sa Maynila.
- Latest
