Lola sugatan sa hit-and-run
MANILA, Philippines — Sugatan ang isang 74-anyos na lola nang ma-hit-and-run ng isang SUV habang tumatawid sa pedestrian lane sa A. Bonifacio Avenue sa Marikina, Sabado ng madaling araw.
Nagtamo ng hiwa sa noo at mga gasgas sa iba’t ibang bahagi ng katawan ang biktimang si Dolores De Gala.
Patawid ang biktima sa pedestrian lane nang may biglang dumaan na sasakyan at napaatras siya subalit nasalpok pa rin na ikinatilapon niya.
Tinulungan siya ng isang rider at iba pang nakasaksi bago nakatawag ng tulong sa kanyang kapatid, Rumesponde rin ang nakasasakop na rescue team ng Barangay Tañong.
Ayon sa ulat, sinabi ni Chairman Danny Del Castillo ng Brgy.Tañong na naabutan pang nakahiga sa kalsada ang matanda na dumudugo ang ulo.
Ang rider na humabol sa nakabanggang SUV ang nagbigay sa barangay ng plate number at ebidensiyang may nabakbak sa bahagi ng sasakyan. Ang sasakyang tumakas ay nakita ng apo ng biktima na na-post at ibinebenta online bago pa naganap ang insidente.
Inaasahang mabilis na matutunton ng Marikina Police ang driver na suspek sa insidente.
- Latest
