Suspect sa pagpaslang sa brgy. treasurer, arestado
MANILA, Philippines – Timbog ang isang 42-anyos na officer in charge (OIC) ng security sa National Power Corporation (Napocor) ilang oras matapos matukoy sa closed circuit television (CTTV) na siya ang huling tao na nagtungo sa bahay ng pinaslang na barangay treasurer sa Quiapo, Maynila, kamakalawa ng gabi.
Inihahanda na ni PO3 Bernardo Cayabyab, ng Manila Police District-Homicide Section, ang kasong murder laban sa suspek na si Gabriel Ambuyot security officer ng Agilex Security Agency Inc. na nakatalaga sa Napocor building sa Port Area, Maynila at residente ng Olivares Compound, San Dionisio, Parañaque City.
Nabatid na dakong alas- 4;30 ng hapon nang dakpin si Ambuyot sa Napocor na nasa tabi lamang ng Guwapotel sa Port Area.
Nag-ugat ang pagkaka-aresto sa suspek nang tawagan ni PO3 Cayabyab ang kaibigan ng biktima na si Moonyen M. Soriano, 36, empleyado ng Manila Department of Social Welfare and Development (DSWD), upang magbigay ng kanyang nalalaman hinggil sa pagkamatay ng biktimang si Arlene Mediavilla, 39, treasurer ng Brgy. 390 Zone 40, District. Ang biktima ay nadiskubreng nakahandusay at naliligo sa sariling dugo dakong alas-9:45 noong Sabado sa loob ng kanyang bahay.
Ayon sa imbestigasyon, ang suspek ay karelasyon ng biktima. Madalas umanong mag-away ang dalawa nang magselos ang nasawi dahil dumating mula sa ibang bansa kamakailan ang nobya ng suspek. Nakita sa CCTV na ang suspect ang huling kasama ng biktima bago ito natagpuang patay.
- Latest