Paslit patay sa bundol ng jeep
MANILA, Philippines - Nasawi ang isang 9-anyos na batang lalaki makaraang mabundol at makaladkad ng isang rumaragasang pampasaherong jeep, kamakalawa ng hapon sa Caloocan City.
Hindi na umabot ng buhay sa Caloocan City Medical Center (CCMC) ang biktimang si Mark Daniel Martinez, ng Mabini St., ng naturang lungsod. Agad namang nadakip ang suspek na si Joseph Misola, 29, ng Dagat-Dagatan Avenue, Kawal St., ng naturang lungsod.
Sa imbestigasyon, papatawid ang biktima sa may A. Mabini St. sa may 5th Avenue nang mabundol ng jeep na ipinapasada ni Misola dakong alas-3:15 ng hapon.
Makaraang mabundol, napailalim pa sa jeep at nakaladkad ang paslit na dahilan ng matinding pinsala at agad na pagkasawi nito.
Agad namang sumuko sa mga rumespondeng barangay tanod at pulis ang nakabundol na tsuper na nahaharap ngayon sa kasong reckless imprudence resulting to homicide.
- Latest
