2 tumalon sa tower, mall, lasog
MANILA, Philippines – Patay ang isang hindi pa nakikilalang babae nang bumagsak mula sa mataas na palapag ng Manhattan Tower na matatagpuan sa Gen. Romulo Avenue sa Araneta Center, Cubao Quezon City sa pagitan ng alas-3:30 hanggang alas-4 ng hapon kahapon.
Sa inisyal na ulat ng Quezon City Police Cubao Station, ang nasawing biktima ay tinatayang nasa 20 hanggang 22-anyos. Bumagsak ito sa may pool and garden area ng naturang tower kung saan basag ang bungo nito na sanhi ng agaran nitong kamatayan. Hindi pa mabatid ang tiyak na palapag kung saan ito nagmula.
Samantala, dead on arrival sa Jose Reyes Memorial Medical Center (JRMMC) ang isang 57-anyos na lalaki nang tumalon ito mula sa ikatlong palapag ng Tutuban Centre Mall sa Tondo, Maynila, kahapon ng hapon.
Kinilala ni Senior Insp. Elias Dematera, Police Community Precinct commander na sakop ng Manila Police District-station 2, ang biktimang si Conrado Guttierez, ng Tondo, Maynila.
Sa inisyal na ulat, dakong alas-4:33 ng hapon (Lunes) ng Enero 5, nang makita na lamang na tumalon mula sa ika-3 palapag ng nabanggit na shopping mall ang biktima at lumagapak ito sa ground floor.
- Latest
