9 na parak, inginuso sa EDSA kidnap
MANILA, Philippines - Siyam na pulis halos lahat ay nakadestino sa La Loma Police Station sa Quezon City ang sangkot umano sa kaso ng robbery/kidnapping na kumalat sa social networking site sa Edsa, Mandaluyong City noong Setyembre 1.
Dalawa sa sangkot na pulis, isa rito ay opisyal ang nadakip sa isinagawang operasyon sa lungsod Quezon. Habang pinaghahanap pa ang pitong kasabwat, kabilang ang isang dismis na police inspector.
Ito ang inihayag kahapon nina NCRPO Chief P/Director Carmelo Valmoria at EPD Director P/Chief Supt. Abelardo Villacorta sa press briefing sa Camp Crame kahapon.
Sinabi ni Valmoria na si Chief Inspector Joseph de Vera, nakatalaga sa Investigation Unit ng La Loma Police Station ay nasakote sa nasabing himpilan kamakalawa ng gabi at sumunod naman kahapon ang isa pa na si PO2 Jonathan Rodriguez.
Pakay naman ng malawakang manhunt operations ang pito pang pulis kabilang ang itinurong utak sa krimen na si Senior Inspector Oliver Villanueva, kaklase ni De Vera sa PNPA Class 2001; mga kasamahan ng mga ito sa La Loma Police Station 1 na sina PO2 Mark de Paz, PO2 Ebonn Decatoria, SPO1 Ramil Hacchero, PO2 Jerome Datinguinoo, PO2 Weben Masa at ang nadismis na si Inspector Marco Polo Estrera.
Aminado si Valmoria na totoo ang kumalat na viral video pero ang nakakagulat ay mga pulis pa ang sangkot sa kasong ito na noong una ay inakalang gun toting lamang pero isa palang kaso ng highway/robbery at kidnapping with serious illegal detention.
Sinabi ni Valmoria na may magandang lead na ang PNP kung saan mahahanap ang pito pang pulis na sangkot sa kaso.
Inihayag naman ni Villacorta na malaki ang naitulong sa imbestigasyon ng ipinost ng isang concerned citizen na video sa kaniyang twitter account na naging viral sa social networking site hinggil sa pagharang at panunutok ng baril ng mga suspek sa isang behikulo na hinarang ng mga ito sa EDSA.
Ayon pa kay Villacorta, inaanalisa nilang mabuti at inimbestigahan ang viral video dahilan baka shooting lamang umano ito sa pelikula pero napatunayang totoong insidente ito ng krimen.
Lumilitaw sa imbestigasyon na pera ang habol ng grupo ng mga pulis sa pagdukot sa dalawang biktima na pawang mga empleyado ng isang negosyante na may-ari ng construction firm dahil may dala ang mga itong P2 milyon na nakuha ng mga suspek.
Ang mga biktima ay galing Quezon City lulan ng hinarang na Toyota Fortuner dakong alas-2:45 ng hapon patungo sa Pasay City para ibayad ang nasabing halaga sa pagbili ng equipment sa kanilang construction firm.
Samantala, madali namang natukoy ang mga suspect sa tulong ng digital graphic enhancement sa ginamit ng mga itong behikulo na isang kulay abong Honda Civic (ZJB 149) na nabili ng nadismis na si Estrera habang ang Toyota Hi- Ace van na may conduction sticker ay naibenta naman kay De Vera. Samantala, bukod dito ay pinagwithdraw pa ng mga suspect ang mga biktimang sina Ustadz Samahuddin ng P33,000.00 sa kaniyang ATM account at ang isang alyas Kamal ng P30,000.00 mula rin sa ATM account ng mga ito.
Lumilitaw naman na isang babae na dating girlfriend ng isa sa mga biktima ang naging kontak ng mga pulis at umano’y nagyaya pa sa mga itong kumain bago umalis patungong Pasay City ng maganap ang insidente.
Itinanggi umano ni De Vera na kinidnap at kinuha nila ang nasabing halaga sa dalawang biktima na iginiit na isa umano itong lehitimong anti-drug operation pero hindi naman ito konektado sa Anti Illegal Drugs Special Operation Task Group ng nasabing himpilan at sa interogasyon ay umamin rin sa krimen. Ang mga biktima ay pinalaya rin ng naturang mga pulis matapos dalhin sa himpilan ng La Loma Police noong Setyembre 1 dakong alas-9 ng gabi.
- Latest
