Bebot na ‘tulak’, timbog

MANILA, Philippines - Arestado ang isa umanong babaeng ‘tulak’ matapos makuhanan ng iligal na droga sa isinagawang buy bust operation ng Philippine Drug Enforcement Agency (PDEA) sa Manila, iniulat kahapon.

Kinilala ni PDEA Director General Undersecretary Arturo G. Cacdac, Jr. ang suspek na si Janisah Edris, alyas Sultana, 21, vendor ng Palanca Street, Quiapo, Manila.

Ayon kay Cacdac, naganap ang operasyon sa pagitan ng suspek at isang PDEA undercover agent na nagpanggap na buyer ganap na alas- 10:00 ng gabi sa may kahabaan ng Arlegui Street, San Miguel.

Nakuha sa suspek ang shabu na may timbang na 115 gramo ng shabu na nagkakahalaga ng P184,000.

Si Edris ay nahaharap ngayon sa  kasong paglabag sa Section 5 (Sale of Dangerous Drugs), Article II ng Republic Act 9165, o ang Comprehensive Dangerous Drugs Act of 2002.