2 utas sa sunog sa Taguig
MANILA, Philippines - Dalawa ang patay sa isang sunog sa residential area ng Barangay Maharlika Village sa Taguig City Martes ng gabi.
Kinilala ng Taguig Fire Department ang mga biktimang sina Pakirim Kudarat at Norayda Diamla.
Hindi na umabot nang buhay sa Taguig-Pateros District Hospital ang 61-anyos na si Kudarat matapos atakihin sa puso.
Natagpuan namang wala nang buhay at may sunog ang ilang bahagi ng katawan ang 40-anyos na si Diamla.
Sinabi ni Sr. Inspector Vener Sevilla ng Taguig Fire Department na nasa 72 kabahayan na gawa sa light materials ang nilampon ng sunog na nagsimula bandang 9:25 ng gabi.
Aabot sa 100 pamilya ang nawalan ng tirahan, habang nasa P300,000 ang halaga ng pinsala.
Naapula ng mga bumbero ang sunog bandang alas-11 ng gabi na nagsimula dahil sa naiwang nakasinding kandila.
- Latest
