UDM prexy inirereklamo ng faculty members

MANILA, Philippines - Inirereklamo ng mga guro  kay Manila Mayor Joseph Estrada  si Unibersidad de Manila  President Dr. Benjamin Tayabas hinggil sa umano’y hindi makataru­ngang pamamalakad nito sa nabanggit na unibersidad.

Ilan  lamang sa mga  reklamo ng UDM Faculty Association ay ang kawalan umanong karapatan ni Tayabas na pamunuan pa ang   unibersidad dahil  mahina na umano ito matapos na dumaan sa isang  heart by pass surgery kung  saan hindi umano ito nagbigay ng anumang  clearance mula sa kanyang doctor na karapat-dapat  at malakas pa ang panga­ngatawan upang  humawak ng  sensitibong puwesto.

Iginiit din ng mga ito ang kawalan ng appointment mula sa city government ang  pagkakaupo ni Tayabas bukod­ pa sa pagiging overage nito batay na rin sa Re­so­lution No. 990764 ng  Civil Service Commission.

Nababahala umano ang  faculty sa umano’y maling pamamalakad ni Tayabas kung saan maaaring masira ang reputasyon ng uni­bersidad.

Subalit ayon naman kay Tayabas,  ang reklamo ng  mga guro at faculty ay bunsod na rin ng kanyang ginawang  pagpapahinto sa  umano’y ‘extra-load’  ng mga guro na umano’y nagiging gatasan ng mga ito.

Lumilitaw na may guro na sobra-sobra ang  ‘extra load’ samantalang hindi naman naitataas ang  kalidad ng  pagtuturo at edukasyon sa UDM.

Nagsimula umano ang kanyang  pagmomonitor nang makita niya ang  pagkalat ng mga estudyante sa lansa­ngan gayundin sa  ilang mga establisimyento samantalang  oras ng  klase.

Hindi umano tama na ginagastusan at pinopondohan ng  pamahalaan ang  UDM samantalang hindi naman  maganda ang resulta ng mga nagtatapos ng   kolehiyo dito.

Aniya, hangad  ng UDM na makipagsabayan sa ibang unibersidad upang makakuha ng maayos at magandang  trabaho ang mga nagsipagtapos dito.

Ito lamang ang tanging paraan upang mai-angat ang  pamilyang mahihirap sa Maynila.