Lalaki lasog sa hit and run

MANILA, Philippines - Kalunus-lunos ang sinapit ng isang hindi pa nakikilalang lalaki makaraang mabiktima ng hit and run sa Andrews Ave­­nue sa Pasay City kahapon ng madaling-araw.

Patay na nang madatnan ng mga rescuers ang biktima na tinatayang nasa 40 hanggang 50-anyos, may taas na 5’4, nakasuot ng kulay asul na t-shirt at short pants.

Batay sa  isinagawang im­bestigasyon ni SPO3 Murrillo ng Traffic Enforcement Unit ng Pasay City Police dakong alas-5:30 ng umaga ng mahagip ng hindi pa mabatid na sasakyan ang biktima sa kahabaan ng Andrews Ave­ nue, Maricaban ng naturang lungsod­.

Dahil sa walang nakasaksi sa insidente, tinakasan ng walang konsensyang tsuper ang kanyang krimen at hinayaan na masawi ang biktima.

Wala namang nakuhang wallet sa katawan ng biktima o anumang dokumento na maaaring pagkunan ng kanyang pagkakakilanlan. Dinala naman ang labi ng biktima sa Rizal Funeral Homes kung saan maaaring mapuntahan ng mga kaanak nito para kilalanin.