1 pa dedo sa ‘killer highway’

MANILA, Philippines - Patay ang isang 43-anyos na lalaki, habang sugatan din ang kasama nito makaraang mabundol ng isang kotse at isang motorsiklo sa may bahagi ng Commonwealth Avenue, lungsod Quezon kahapon ng madaling-araw.

Kinilala ni PO3 Alfredo Moises­ ng Quezon City Police Traffic Sector 5 ang nasawi na si Henry Jober ng Pitogo St., Area B Payatas, Quezon City. Agad  na nasawi si Jober matapos na mabundol ng isang kotseng hindi naplakahan.

Sugatan naman ang kasama nitong si Antonio Villarin, 49, ng Sarmiento St., Brgy. Holy Spirit nang mahagip naman ng isang motorsiklo.

Base  sa ulat, nangyari ang insidente sa may kahabaan ng Commonwealth Avenue sa kanto ng Samonte St., Brgy Holy Spirit.

Pauwi na umano ang dalawang biktima at tumatawid sa lugar nang biglang mahagip ng humahagibis na kotse si Jober. Sa lakas ng impact, tu­milapon ang biktima. 

Agad namang inalalayan ni Villarin ang biktima, suba­lit siya naman ang nahagip ng isang rumaragasang motorsiklo ni Jeffrey Moreno, 32, at nasugatan. Si Villarin ay nakaratay ngayon sa East Ave­nue Medical Center  habang patuloy ang pagsisiyasat ng awtoridad.