Nakialam, binoga

MANILA, Philippines - Isang binata ang patay makaraang mapagbalingang barilin ng isa sa grupo ng mga kalalakihan nang tangkain niyang awatin ang mga huli sa pamamaril sa isang lalake na nam­bastos sa kaibigang babae nito sa Brgy. Batasan Hills, lungsod Quezon kahapon ng madaling-araw.

Dead-on-arrival sa ospital ang biktimang si Raul Cantiga, 23, binata, ng Brgy. Batasan hills.

Sugatan din ang isang Shun Joson, 28, binata, estudyante ng nasabi ring lugar matapos na unang mabaril ng mga suspek na nakilala sa alyas Greggy, kalbo, Ekway at isang Memon na mabilis na nagsipagtakas.

Nabatid na tinangka ni Cantiga ang awatin sa pag-aaway sina Joson at Greggy pero napagbalingan siya ng suspek at binaril siya. (Ricky Tulipat)