Mister napatay sa mismong birthday

MANILA, Philippines - Isang malagim na pag­bati ang ibinigay na regalo sa isang mister ng isa sa dalawang lalaki matapos na siya ay pagtatagain at mapatay sa mismong kan­yang kaarawan dahil sa alitan sa trapik sa lungsod ng Quezon kamakalawa.

Dead-on-the-spot sa pinangyarihan ng krimen ang biktimang si Joeboy Baluyot, 32, may-asawa, caretaker ng Brgy. Payatas sa lungsod.

Natukoy naman ang isa sa mga suspek na si Rolando Brillantes, alyas Bugoy na mabilis na naka­takas matapos ang in­sidente.

Ayon sa ulat, nangyari ang insidente sa may ka­habaan ng Maligaya St., corner Litex Road, sa na­turang barangay ganap na alas-8 ng gabi.

Bago nito, nagse-cele­b­rate umano ang biktima ng kanyang ika-32 kaara­wan kung saan nagkaroon ng inuman sa kanilang tahanan.

Ilang oras ang lumipas, isang kaibigan nito na si Jeffrey Penas ang nag­pasyang umuwi kung saan sinamahan ito ng biktima dahil nangako ang una na magbibigay ito ng pera pambili ng alak.

Sakay ng isang motor­siklo ang biktima kasama si Penas at tinatahak ang lugar nang biglang sumul­pot ang isang tricycle na sina­sakyan ng suspek at humarang sa daraanan ng mga una. Dahil dito, nag­ka­roon ng mainitang kom­prontasyon ang biktima at suspek hanggang sa mag­tungo sa tricycle ang huli at kinuha ang isang pa­talim saka binalikan ang una.

Nang makita ito ni Pe­nas, tinangka nitong awa­tin si Brillantes, ngunit binale­wala ito ng huli at pinagtataga ang biktima sa katawan. Matapos ang insidente ay mabilis na tumakas ang mga suspek. (Ricky Tulipat)