P2 rollback sa kada litro ng diesel at kerosene
Muling nagsagawa ng mas mataas na P2.00 rollback kada litro sa presyo ng produktong diesel at kerosene ang independent oil player na Unioil kahapon ng tanghali mas mataas kumpara sa P1 kada litrong ini-rollback ng ibang kompanya ng langis.
Ayon kay UniOil spokesman Raymond Zorilla na hindi na sila nagsagawa ng rollback sa gasoline sa dahilang mas mababa pa rin ang kanilang presyo kumpara sa iba pang Oil companies.
Ang naturang rollback ng Unioil ay mas mataas kumpara sa P1 kada litrong ibinaba sa presyo ng produktong petrolyo ng Eastern Petroleum, Pilipinas Shell, Petron at Chevron na pawang naging epektibo kahapon ng alas-12:01 ng madaling-araw.
Nauna dito, dakong alas-10:00 kamakalawa ng gabi ng unang magpatupad ng rollback ang SeaOil.
Ginawa ng mga kompanya ng langis ang rollback bunsod na rin sa panawagan ng Malakanyang na magbaba ng kanilang presyo at repleksyon na rin sa pagbaba ng presyo nito sa World Market.
Magugunita na kamakailan ay minaliit ng Unioil ang ipinapatupad na P1 hanggang P2 kada litro rollback ng ilang kompanya ng langis kumpara sa ipinapatupad nilang P3 rollback.
Samantala, malaki ang hinala ng mga sektor ng transportasyon na napilitan lamang na mag-oil price rollback ang mga oil companies ng bansa dahil sa bantang tigil-pasada ng mga una.
Ayon sa PISTON, Fejodap at 1UTAK, sapilitan lamang umano bawas presyo sa mga produktong petrolyo na panibagong ikinasa ng mga ito dahil na rin sa nakaambang nationwide transport holiday na iniuumang ng mga tsuper at operators ng bansa.
Nauna rito, magugunita na walang nais magpahayag ng price reduction sa kabila ng labis na pagsadsad ng halaga nito sa world market na umabot na lang ng $77 kada-bariles, ngunit biglang kumambyo lamang ang mga ito nang magbanta na si Department of Energy (DoE) Secretary Angelo Reyes na ipapa-audit ang mga oil companies. Pangamba tuloy ng mga motorista, talagang may anomalya sa libro ng mga ito kung kaya’t ayaw umano nila halos sumailalim sa audit.
- Latest
- Trending
