ATM gang todas sa shootout

Patay ang isang hini­hinalang holdaper na umano’y miyembro ng ATM hold-up gang ma­tapos na makipagpalitan ng putok sa mga miyem­bro ng Quezon City Police District makara­ang maka­pambiktima ito at isa pang kasamahan, ka­hapon ng madaling-araw sa natu­rang lungsod.

Patuloy na kinikilala ng pulisya ang nasawing sus­pek na nasa pagitan ng edad na 20-25 anyos kung saan tinamaan ito ng bala sa ulo habang naka­takas naman ang kasa­ma­han nito.

Sa ulat ng QCPD-Sta­tion 7 (Cubao), naganap ang insidente dakong ala-1:30 ng madaling-araw sa panulukan ng 9th Avenue at P. Tuazon St. sa Cubao kung saan nag­sasagawa ng mobile patrol opera­tions ang pulisya.

Nauna dito, nabatid na nabiktima ng mga suspek si Ramon Lacorte, 25, nang holdapin ng dala­wang lalaki matapos na mag-withdraw ito sa ATM booth ng isang bangko sa 16th Avenue. Agad siyang tinutukan ng baril ng mga suspek at tina­ngay ang P3,000 niyang cash.

Agad naman itong nag-ulat sa Station 7 na nag­sagawa ng follow-up ope­ration.

Namataan ng mga pulis ang dalawang suspek na kahina-hinala ang kilos sa naturang lugar na tinangka nilang lapitan ngunit agad silang pinaputukan ng mga ito.

Gumanti naman ng putok ang mga pulis kung saan napuruhan ang na­sawing holdaper. Wala namang tinamaan sa mga pulis kung saan nahagip lamang ang kanilang sa­sakyan.  Nare­kober sa bik­tima ang kalibre .38 baril at mga bala na gina­mit nito sa pakikipag­barilan.

Ayon kay Cubao po­lice station chief, Supt. Popoy Lipana, tinatawag nilang ATM Gang ang naturang mga suspek na talamak sa bisinidad ng Araneta Center.  Estilo umano ng mga suspek na mag-abang ng mga mag­wi-withdraw sa binabanta­yang ATM booth at saka hoholdapin pag­labas ng biktima. 

Umaabot umano sa 3 hanggang 4 na insidente ng naturang pangho­holdap ang nagaganap sa bisi­nidad ng Cubao sa isang gabi kaya pinaigting nila ang pagpa­patrulya sa lugar upang masawata ang mga ito.  (Danilo Garcia)