Paslit utas sa stepdad na Hapones

Nasawi ang  isang 4-anyos na batang babae matapos na pagmalupitan ng kanyang stepdad na Hapones na hu­mataw sa kanya ng bakal ng sinturon noong nakaraang Linggo ng hapon sa Maynila.

Namatay habang ginaga­mot dakong alas-7:35 ng hapon kamakalawa si Kate Julia Dua, 4, residente ng  Unit J 7th Floor Legaspi Tower, 300 Roxas Blvd., Manila,  makara­ang magtamo ng multiple hematoma, ayon sa kanyang attending physician na si Dr. Josephine Bolivar.

Batay sa report na tinang­gap ni  Chief Insp. Alex Yan­quiling, hepe ng Homicide Section ng Manila Police Dis­trict, naganap ang insidente noong Hulyo 7 sa bahay mis­mo ng biktima.

Nabatid na napansin ng ina ng biktima na si Harrold Shiozawa ang pananamlay ng anak , hindi makausap at puno ng pasa sa iba’t ibang bahagi ng katawan.

Agad na ikinatwiran ng  suspect na si Toshiyuki Shio­zawa, 39, isang businessman na posibleng nahulog sa hag­dan ang biktima kung kaya’t naging  tulala ito at nagkaroon ng mga  pasa sa katawan. Ang suspect ay may stall ng kainan sa Harrison Plaza.

Dala ng pag-aalala, mina­buti ni Harrold na pakainin ang  anak hanggang sa nakatulog ito. Kinabukasan ay laking gulat ni Harrold nang mapan­sing hindi pa rin bu­mabangon ang bata. Ginising niya ito at nagulat siya nang su­muka at nawalan  ito ng malay.

Dahil dito, ipinasya na lamang nina Harrold, suspect at isang kaibigan na nakilala lamang sa pangalang Masa na dalhin sa Manila Doctors Hospital ang biktima. Dito nila nadiskubreng nagtamo ng multiple hematoma ang bata.

Sinita ni  Harrold ang  sus­pect at dito  inamin ng huli na pinalo niya ng bakal ng sin­turon ang bata dahil nais umano niya itong disiplinahin.

Sinabi ng suspect na mahal niya ang bata at hindi niya inakala na magreresulta ito sa kamatayan.

Nabatid pa na kinuha ni Harrold ang anak mula sa Ca­gayan de Oro at dinala sa May­nila. Plano niya itong isama sa Japan at doon na pag-aralin.

Hindi naman niya alam na pagmamalupitan ito ng kan­yang asawang Hapones.

Inihahanda na ang kaso laban sa suspect na amain.