'No-pansin' sa pamilya, lalaki nagbigti

Isang lalaki ang nagpakamatay sa pamamagitan ng pagbibigti makaraang magtampo dahil sa hindi na umano ito pinapansin ng kanyang pamilya, kahapon ng umaga sa lungsod ng Pasig. Nakabitin gamit ang isang nylon cord ng matagpuan ng kanyang kapatid ang nasawing si Carlito Barreto,25, ng Amang Rodriguez Avenue ng nasabing lungsod.

Nabatid na dakong alas-8:30 ng umaga nang katukin ng kanyang kapatid na si Laarni, 18 ang kuwarto ng nasawing kuya para yayaing kumain, gayunman matapos ang maraming pagkatok ay hindi ito sumasagot.

Napilitan si Laarni na kunin ang susi ng kuwarto at binuksan ito kung saan nabungaran niya ang nakabigting kuya.Malaki ang paniwalang sumama ang loob ni Carlito dahil sa pakiramdam nito ay hindi siya pinapansin ng mga magulang. (Ulat ni Edwin Balasa)