Shootout: Carnapper todas sa TMG

Itinanghal na bangkay ang isang lalaki na umano ay miyembro ng isang kilabot na carnapping syndicate matapos na makipagbarilan sa isang kagawad ng Traffic Management Group (TMG) kahapon ng tanghali sa Ermita, Manila.

Sa kasalukuyan ay hindi pa nakikilala ang suspek habang nasugatan naman sa naganap na barilan si Insp. Ernesto Eco Jr., 35, miyembro ng TMG at isang bystander na si Arthur Loui, 46, habang ito ay nakasakay sa kalesa.

Sa inisyal na imbestigasyon ng WPD-Homicide Division,dakong alas-12 ng tanghali nang sundan ni Eco ang sinasakyang puting Mitsubishi Galant ng suspek sa kahabaan ng San Marcelino st., Ermita, Manila.

Subalit habang sumusunod si Eco ay napansin umano siya ng suspek na agad inihinto ang sasakyan at bumaba.

Hindi umano akalain ni Eco na sa pagbaba ng suspek ay bubunot ito ng baril at mabilis na siya ay pinaputukan at tinamaan sa labi.

Sa pagpapalitan ng putok ay natadtad ng bala ang suspek na ikinasawi nito habang tinamaan naman ng ligaw na bala si Loui at kasalukuyang inoobserbahan sa Manila Medical Center. (Ulat ni Grace dela Cruz)