Estudyante pinagtripan ng 5 fratmen, todas

Isa na namang binatilyo ang naging biktima ng marahas na sistema ng fraternity matapos na pagtulungang bugbugin at saksakin ito ng limang kabataan matapos siyang mapagtripan ng mga ito, kamakalawa ng gabi sa Marikina City.

Hindi na umabot ng buhay sa Amang Rodriguez Medical Center ang biktimang nakilalang si Alexander Austria, 16, estudyante, at residente ng #176 Balubad St., Brgy. Nangka, ng lungsod na ito.

Nakatakas naman ang limang hindi pa nakikilalang suspect na pawang mga teenager din umano matapos ang krimen.

Sa ulat ng pulisya, nakatayo umano sa kanto ng Balubad St. ang biktima nang lapitan ng mga suspect. Walang sabi-sabing bigla na lamang umano itong pinalibutan at pagtulungang bugbugin.

Isa sa mga suspect ang naglabas ng patalim at ilang beses na inundayan ng saksak ang biktima.

Inaalam pa ng pulisya kung saang grupo kabilang ang mga suspect at kung mayroong atraso ang biktima sa mga ito na naging sanhi ng krimen. (Ulat ni Danilo Garcia)