Babayeng balik-balik sa prisohan nakuhaag P3.7 milyong nga shabu

CEBU, Philippines — Nadakpan ang usa ka gituohang drug personality human makuhaan sa mga operatiba sa Philippine Drug Enforcement Agency-Central Visayas (PDEA-7) og kapin 550 gramos nga gituohang shabu nga gibanabanang P3.7 milyones atol sa buy-bust operation atong Biyernes sa kadlawon sa Sitio Lutaw-Lutaw Barangay Sto. Niño, Cebu City.

Ang suspetsado, giila lamang sa alyas "Belin" ug residente sa Barangay Ermita.

Matud pa ni Belin, nadakpan na siya niadtong tuig 2021 ug nakagawas tuig 2025 sukad sa iyang paggawas sa prisohan, unom  ka buwan nibalik siya sa iyang naandan nga binuhatan ug matud pa P10 mil matag kuha niya sa illegal nga drugas ang iyang komisyon.

Ang mga awtoridad niingon nga usa ka semana nga surveillance ilang gihimo ug gituohang makahalin ang suspetsado og mokabat sa 700 gramos nga shabu matag semana.

Sa inisyal nga imbestigasyon, nasayran usab nga ang suplay sa iyang ilegal nga droga nagagikan sa usa ka indibidwal nga anaa karon sa sulod sa usa ka jail facility.

Padayon pa ang  imbestigasyon sa PDEA-7 aron mailhan ang ubang mga nalambigit sa maong drug supply chain ug masuta ang posibleng koneksiyon niini sa ubang mga drug personality nga naglihok sa Cebu City ug ubang bahin sa lalawigan sa Sugbo.

Samtang sa laing operasyon, nadakpan ang usa ka 22-anyos nga estudyante sa junior high school human giingong namaligya og gituohang shabu atol sa buy-bust operation nga gihimo sa Balamban Municipal Police Station sa Barangay Abucayan, Balamban, Cebu, sayo sa buntag niadtong Martes, Hulyo 15.

Gila sa kapulisan ang suspek pinaagi lamang sa alyas nga “Saro,” nga ilang giingong bag-o palang sa ilang monitoring isip street-level individual sa pagbaligya og ilegal nga droga sa lungsod.

Ang operasyon gipahigayon sa Drug Enforcement Unit (DEU) sa Balamban Municipal Police Station mga alas 4:31 sa buntag, uban sa koordinasyon sa Philippine Drug Enforcement Agency (PDEA).

Sa operasyon, nadakpan ang suspek ug narekober ang usa ka heat-sealed plastic sachet nga gituohang shabu nga maoy giingong gibaligya sa poseur buyer.

Narekober usab ang unom pa ka sachet nga adunay gituohang shabu, usa ka itom nga coin purse nga giingong gigamit sa pagtipig sa ilegal nga droga, ug ang gimarkahang P500 nga buy-bust money.

Dugang sa mga imbestigador, giingong nagbaligya ang suspek og ilegal nga droga sa Barangay Hingatmonan ug sa kasikbit nga mga barangay.

Gituohan usab nga nagakuha siya og suplay gikan sa usa ka tawo nga nailhan lamang sa alyas nga “Do,” nga giingong nagpuyo sa Barangay Abucayan.

Ang mga nakumpiskang gituohang shabu isumite alang sa laboratory examination, samtang ang mga suspetsado pasakaan og kasong paglapas sa Sections 5 ug 11, Article II sa Republic Act No. 9165, o ang Comprehensive Dangerous Drugs Act of 2002.— Shiela H. Agrabio, IBM BANAT NEWS