P4.36 bilyong nga buhis unta ang makolekta gikan sa smuggled nga sigarilyo—BIR

CEBU, Philippines —  Gihimo sa Bureau of Internal Revenue (BIR) ang imbentaryo sa 10,729 ka master cases s

a gituohang ilegal nga sigarilyo nga nasakmit sa usa ka joint enforcement operation sa National Bureau of Investigation-Cebu District Office ug Bureau of Customs-Port of Cebu pag Hulyo 2, 2026 sa Mandaue City, Cebu.

Base sa ilang imbentaryo gibanabanang kung nibayad sa obligasyon sa buhisang nagpasulod sa  maong kargamento moabot ni og kapin P4.36 bilyones.

Ang maong sigarilyo gikarga sa 25 ka 20-foot container vans nga sumala pa sa BIR.

Ang ahensya nibanabana nga ang  katugbang nga obligasyon sa buhis moabot sa P4,366,204,585.38, apan ipaubos pa kini og balik og final inventory, verification ug assessment.

Sa inisyal nga eksaminasyon, nasuta sa BIR nga ang mga brand sa sigarilyo nga MODERN ug GUIA walay nakitang mga internal revenue stamps, pamatuod nga wala kini moagi sa legal nga importasyon sa mga produkto gikan sa laing nasud.

Matud pa ni BIR Revenue Region No. 13-Central Visayas Regional Director Douglas Rufino nga posibleng naglapas kini sa mga probisyon sa National Internal Revenue Code of 1997, ingon man sa mga revenue regulations nga nagmando sa pagbutang sa internal revenue stamps sa mga tobacco products nga adunay excise tax.

Ang imbentaryo pinasubay ni sa direktiba ni BIR Commissioner of Internal Revenue Charlito Martin R. Mendoza nga pangusgan ang kampanya batok sa paghimo, pag-angkat, pagbiyahe, pagtip-ig, pagapud-apod ug pagbaligya sa iligal nga sigarilyo ug vape products.

Sa laing bahin, gipadayag sa BOC-Port of Cebu nga ang maong shipment adunay gibanabanang kantidad nga P980 milyones ug giisip nila ni nga usa ka dakong kalampusan sa gipakusgang kampanya sa ahensya batok sa smuggling.

Ang pag-abli sa mga container vans gihimo human magpagawas ang BOC og Letter of Authority ug Mission Order ubos sa Section 224 sa Customs Modernization and Tariff Act (CMTA), nga nagmando sa inspeksyon sa 25 ka 20-foot container vans nga nahimutang sa maong pribadong pantalan sa Mandaue City.

Miingon si BOC Commissioner Ariel F. Nepomuceno nga dili mohunong ang ahensya sa pagpakusog sa intelligence-driven enforcement operations kauban ang mga partner agencies aron hingpit nga mabungkag ang mga smuggling network, mapanalipdan ang mga lehitimong negosyo, ug mapreserbar ang pundo sa gobyerno.

Ang BOC-Port of Cebu, ubos sa pagpanguna ni District Collector Alexandra Yap-Lumontad, mipasalig nga magpadayon kini sa pagpalig-on sa intelligence-driven enforcement operations uban sa mga partner law enforcement agencies aron mapugngan ang tanang matang sa smuggling ug masiguro ang pagsunod sa mga balaod sa customs. (BANAT NEWS)