Masuko dayon

Dear Tito Miguel,

Tawga lang ko og Shantelle Mae, 24 anyos, taga Barangay Tisa , Cebu City. Naa koy uyab , siya si Phillip , mag-duha na mi ka tuig. Ma-feel man gyud nako nga gihigugma gyud ko niya. Apan ang problema, dali kaayo siya masuko. Gamay ra nga butang, musaka dayon iyang tingog. Usahay magyawyaw siya bisan naa mi sa public nga lugar, ug maulaw ko. Dili man siya pisikal nga manakit, pero kung masuko siya, murag dili siya kabalo mokontrol sa iyang gibati. Makasulti siya og mga pulong nga makapasakit, unya inig kahuman, mangayo dayon og pasaylo. Moingon siya nga wala niya gituyo ug nagpadala lang siya sa iyang emosyon.

 Gisultihan na nako siya nga nasakitan ko ug nahadlok ko usahay sa iyang kasuko. Moingon siya nga magbag-o siya , apan karon wala gihapon siya nausab. Nahigugma ko niya, apan gikapoy na ko sige’g sabot . Unsaon nako pagtabang niya nga makakat-on siya og kontrol sa iyang kasuko? O kinahanglan ba nga hunahunaon na nako ang akong kaugalingong kaluwasan ug kahimtang? — Shantelle Mae

* * *

Shantelle Mae,

Lisod na usbon kay mao na iyang pagkatawo. Siya mismo ganahan mag-usab pero maglisod siya’g supak sa iyang kaugalingon. Natural na niya, sama ra nga kun ang tawo hilomon, kalma lang maski tensyonado na ang sitwasyon. Ang sakit nga istorya usahay mas lawom pa makasamad kaysa pisikal nga pagdagmal. Dili angay agwantahon tungod lamang kay  gipaagi sa pulong. Dunay  purohan nga kini moabot sa pagpanapat. Sige na man ka’g reklamo, siya mismo nisaad magbag-o apan wala’y nahitabo, nagtuyok tuyok ra mo sa inyong problema. Pero kun gusto pa ka magpadayon mo, sa pamasin nga sa umaabot siya magbag-o, angay tingali siya modangop sa professional nga tabang, sama sa anger management.

Sa imong bahin, kun mo-aksyon na siya’g kasuko ug mobuhi’g sakit nga istorya, lakaw dayon palayo, ikyas sa sitwasyon nga makapasakit kanimo. Ayaw’g lingi, ayaw’g balik hangtod nga siya mogukod mangamuyo. Kun imo pa hataga’g laing higayon, ingna dili na mistil mangayo’g pasaylo, ang buhat ang iyang pa-istoryahon mismo. Wala’y silbi ang pangayo’g pasaylo kun wala’y pagbag-o. Kun mausab man, ayaw dayo’g salig. Posible igo ra na magpabugnaw aron maulian ka. Mobukal ra gihapon na’g balik. Kun imo na gibuhat ang tanan apan nagtuyok tuyok ra mo, biya na. Piyonga kuno imong mga mata, makita ba nimo imong kaugalingon kuyog niya nga mobuto ini’g karon ug unya? —Tito Miguel

Magpatambag ka? Ipada kang Tito Miguel: 0991-318-9366