Halaran ko ikaw sa damgo

Matag gabii ilang makita sa mga silingan si Damian nga naa sa tindahan ni Inse Ciriaca nag-inom og makahubog. Ug kon mahubog na gani siya, molakaw siya nga magwandogwandog ug mohapit dayon didto sa balay nilang Esmeralda nga nahimutang sa may nabungtod nga bahin sa sityo Layong Bituon.

Iyang awitan si Esmeralda og kanta nga nag-ulohan “Nahanaw Ka...ug ang awit nga karon gikanta sa hubog nang si Damian migilis sa mamingaw’ng kagabhion. Ang liriko niini nagkanayon:

Gabii nga mamingaw/Mahilom na ang kalibotan/Kalit ako nga gipukaw sa maanindot mong larawan/Imo akong gihagkan/Gibati ko ang paghigugma/Imo Akong giawitan unya nahanaw ka...

Ug lanog kaayo ang tingog ni Damian, ug bisa’g nakainom siya maayo kaayo niyang pagkalitok ang mga pulong. Kay alang kaniya si Esmeralda mao ang babaye nga iyang gihigugma.

Apan way gusto kaniya si Esmeralda. Ug ang nakapait kay kaslonon na ang dalaga sa hinigugma niining si Bartolome nga anak sa ilang barangay captain.

Lanog ang tingog ni Damian nga medyo karaskaras, ug anha siya makatulog sa tugkaran nilang Esmeralda. Ug motawag siya sa dalaga, “Esmeraldaaaa! Ablihi tawon ang bentana aron tika makitaaa kay gihigugma ko ikawww! Kapaittt, kay kaslonon ka na ug ako igo na lang sa paghalad nimo didto sa akong mga damgoooo!” Ug miabot ang adlaw nga gikasal na si Esmeralda.

Tungod niini, way kukahadlok nga misulod si Damian sa simbahan ug didto mikanta siya ug milanog ang iyang tingog—awit nga gikan sa usa ka hubog nga tawo.

Apan giguyod siya sa iyang mga higala pagawas sa simbahan. Milugnot si Damian ug misutoy og dagan paingon sa sulod sa simbahan ug milahos sa may atubangan sa altar diin tua sila si Esmeralda ug Bartolome nga nanagbarog kuyog sa ilang mga kadugo samtang nagpahulagway. Mora’g bata si Damian nga mihilak ug miligid duol sa nahimutangan nilang Esmeralda ug Bartolome ug unya misuka siya... misuka ug misuka. Ug humag suka makita nga wala na kini maglihok, wala na kini kinabuhi. (Kataposan)