Gakson ko ang mga gapnod

Kanunay gyung makita ni Luis si Marina nga matag hapon anhi maglingkod dinhi sa pangpang nga dunay lubi nga nagbarog nga nagtuhirig umbaw sa puting bunbon sa baybayon.

Tungod man god kini sa nahitabo sa iyang bana nga si Oscar nga wala na makit-i kay nasugatan kini’g unos didto sa lawod.

“Nia ka na sab dinhi sa pangpang, Marina,” ni Luis nga miduol kang Marina.

“Sayod kong si Oscar maoy imong gisigiha’g lantaw sa dagat. Marina, upat na ka buwan ang nakalabay ug wala na mopatim-aw si Oscar ug kini nagpasabot nga lagmit nga patay na siya.

O basi’g gikaon na siya sa dagkong mga mangtas nga iho sa lawod...”

“Buhi si Oscar, Luis,” ni Marina sa hinay nga tingog. “Marina, nagpaabot ka lang sa dili moabot.

Dili na kadto mahibalik pa ang imong bana, patay na kadto siya,” mitupad si Luis paglingkod kang Marina.

Miirog og diyotay si Marina kay dili siya gusto nga dunay makakita nga dikit ra kaayo ang ilang panagtupad.

“Luis, kon maoy imong tumong nga ipadayag mo ang imong gugma nako, kana maoy klarong wala kay mapaabot, kay si Oscar pa gihapon ang nia ni’ng akong kasingkasing,” mipahayag si Marina.

Gitutokan ni Luis si Marina ug iyang nakita ang katahom niini nga angay gyung angkonon sa usa ka lalaki. “Luis, dili mahitabo nga ihatag ko sa lain ang pinitik ning akong kasingkasing.

Bisa’g wala na si Oscar apan dili ko mahimong hikalimtan ang amo’ng mga panumpa.”

“Mahal ko siya ug kon patay na man ugaling siya, dili na ko mahigugma pa pag-usab ug magpabilin akong biyuda hangtod sa hangtod...”

Mitindog si Marina ug midali’g kanaog sa hagdan-hagdan sa pangpang ug midagan kini aron sugaton ang usa ka gapnod nga gitulod sa mga balod paingon sa bunbon.

Nakita ni Luis nga gigakos ni Marina ang gapnod ug iya kining gialsa paingon sa puting bunbon. Dinhi ingon sa nahisagmuyo si Luis ug nakahukom siyang dili na lang ipadayon ang iyang paghalad kang Marina, kay kini walay kapuslanan. (Katapusan)