Nganong pahilakon ang kabos

Sulogoon lang si Edmund dinhi sa mansion sa mga Villamor. Dugay na siya nga nahimong sulogoon o katabang dinhi sa mansion. Siya ang nag-atiman sa hardin ni Mrs. Villamor ug daghan na kaayong mga matahom nga bulak. Ang anak nga dalaga sa magtiayong Villamor nga si Teresa moadto gyud sa hardin matag hapon ug mangayo og rosas kang Edmund.

“Edmundo, ikaw lalaki man gyud, kon itugyan sa usa ka babaye ang iyang kaputli ngadto sa usa ka lalaki, nagpasabot ba kana nga sayun ra siya nga pagka babaye?” mora’g nagpakisayod si Teresa kang Edmundo.

“Ha, aw, kuan, ma’am, dili seguro, uy. Nahigugma lang gyud tingali ang maong babaye ngadto sa lalaki,” nagkangakanga si Edmund kay dili pa man gud siya anad bahin niini. Ulitawo na siya ug sa pangidaron niyang 21 anyos wa pa siya’y hinigugma. Unya kalit lang midugwa si Teresa ug misuka na gyud. Gidali og hawid ni Edmund ang dalaga kay ingon sa hapit na kini malup-og sa pagsinuka. Ug giagak niya kini paingon sa taas sa mansion, lahos didto sa iyang lawak. Sa pagbalik ni Edmund ingon og nagduda siya nga mabdos si Teresa ug si Jethro tingali mao ang nakakutlo sa iyang kaputli.  Si Jethro anak sa kasosyo ni Mr. Villamor sa negosyo ug mamisita kini kanunay kang Teresa. Natinuod ang katahap ni Edmund.

“Edmund, dali ra,” ni Mr. Villamor ngadtong Edmund.

“May isugo ka, sir?” ni Edmund.

“Duna koy isulti nimo, dali adto sa library sa taas,” ni Mr. Villamor. Gusto ni Mr. Villamor nga si Edmundo maoy himuong salvador del mundo sa nahitabo kang Teresa. Dinhi, miuyon na lang si Edmund kay wala man siya’y mahimo kon mosupak siya.

Pagpanganak ni Teresa diha ibilin niini ang bata kang Edmund. Paglabay sa mga katuigan nagtinguha si Teresa nga dad-on ang bata sa laing nasud. “Ma’am, ayaw na tawon ko’g palabii’g pasakit, mahal ko ang bata bisa’g dili nako anak, ako ang giisip niyang amahan ug si  Eliza (anak sa mayordoma sa mansion), maoy giisip nga inahan.” (Kataposan)