Sinulog sa buang

Lorega Proper, Cebu City

Gikan sa balkonahe ning dos-andanang balay nga akong gi-estaran, diin nag-abang ko’g lawak matag bulan sa pagpanarbaho ko sa dakong mall isip promodizer, maoy nalantawan ko sa atbang nga dakong convenience store, nga hilabihang nakasayaw og Sinulog ni Carlo buang, nga gisuliyawan sa tanang mga kustomer nga nanag-inom.

Klaro kaayo sa akong panan-aw ang grupo ni Drigo, ang inilang drug pusher dinhi sa Barangay Kintulimbo sa siyudad nga nanag-iya og drug den nga unahan ra sab og diyutay sa dakong convenience store. Ambot, natukhang naman unta ni si Drigo, apan mibalik man sa pagpalusot sa ginadiling druga ug nag-anam pa gyud kadaghan ang iyang suking manuyopay nga mosulod sa sekreto niyang balay-suyopanan.

“Pit Senyor sa buang kini! Pit Senyor sa mga adik kini! Pit Senyor sa mga palahubog kini! Pit Senyor sa drug pusher kini...!” klaro kong nadungog ang singgit ni Carlo nga naglibotlibot pagsayaw og Sinulog sa mga lamesa sa nanag-inom.

 Sa akong karkulo, mora’g kapin na sa bulan nga kanunay’ng mag-estambay ang buang sa dakong convenience store, nga modalikyat og sulod sa drug den, apan abugon sa mga sakop ni Drigo sa pagpagawas. Mora’g tawong grasa si Carlo buang.

Miliwag ang akong panan-aw ngadto sa drug den. Nagkaguliyang niadtong udtoha! May nagdinaganay! Sus, gironda diay sa taga PDEA ang sulod sa drug den.  Pipila ka gutlo, nanggula ang mga pinosasan nga manuyopay nga sa ihap ko, mikabat sa 15 ka buok. Sa paglantaw ko’g balik sa dakong convenience store, maoy nasugat sa akong panan-aw si Drigo ug upat ka mga sakop nga nagdaling mibiya sa giimnan nilang lamesa aron mosibat. Apan gisugat sila sa dakodako sa raiding team ug gidakop ug giposasan sila si Drigo ug upat ka sakop niini.

“Nalutsan og warrant of arrest ang numero unong drug pusher sa Kintulimbo ug nadakpan ra gayud!” Nakaginhawa ko’g luag. Atol gyud sa Sinulog nga nadakpan si Drigo ug mga sakop niini. Ug nalantawan ko nga miduol si Carlo buang sa tanang mga sakop sa PDEA. Misaludo ang raiding team ngadto sa buang. (Kataposan)