Milagro

Atol sa kasaulogan sa Pista Senyor, kaadlawon nga naabot si Ben sa Basilica Minore del Santo Niño ug naandan na gyud niya ang paghalok kang Sr. Santo Niño tungod sa talagsaong milagro niini  kaniya. Taga siyudad sa Bogo si Ben sa amihanang probinsiya sa Sugbo.

Ug ning kaadlawona sa Pista Senyor, nasaksihan niya ang taas nga kutay sa naglinyang debotos gikan sa nagkalainlaing dapit sa Kabisay-an ug Mindanao. Sa kadalanan, milagubo na ang mga tambol sa matag contingents nga misalmot sa Sinulog Grand Parade sa giagiang rota niini.

Nasayran nga nibakasyon siya sa siyudad sa Marawi sa  dihang niulbo ang gubat sa maong dapit. Gibisita man gud niya sa Mindanao State University ang iyang uyab nga maestra nga taga Bogo City kaniadto ug atua karon nagpuyo  sa Marawi City.

Wala gyud magtuo si Ben nga mabuhi pa siya, tungod kay apil siya sa daghang hostages nga sibilyan nga gidala sa mga teroristang Maute sa ilang hideout. Gikauban ni Ben kadtong pari nga gi-hostage sa mga Maute. Duna’y hostages nga nisulay sa pag-ikyas, apan bangis silang gipusil-patay sa mga terorista.

“Senyor Santo Niño! Luwasa intawon ko! Gusto pa kong mahibalik nga buhi sa among dapit sa siyudad sa Sugbo! Gusto pa kong mosaksi sa imong kapistahan, Senyor Santo Niño...!” ,” ang pag-ampo  ni Ben .

Kanunay gyud niya gikwintas ang imahe sa Senyor Santo Niño.

Uban sa lima ka lalakeng hostages, nagsabot sila si Ben nga mangikyas sa  halawom na nga  kagabhion.

Hugot nga giampingan ni Ben ang iyang gikuwentas samtang nagdagan. Mipaka ang sagunson nga rakrak sa armas. Milukapa ang lima ka kauban ni Ben nga naigo sa bala sa kamatayon.

Nabatyagan niya nga naigo gyud siya sa pangrakrak  apan  padayon siya sa pagdagan. Nahibulong si Ben. Wala  siya madutli sa bala ug dako ang iyang pagtoo nga ang Balaang Bata maoy nagluwas kaniya. 

“Salamat sa milagro mo nako, Senyor Santo Niño! Salamat sa pagluwas mo kanako.,” suma pa niya. (Kataposan)