Kalanggaman

Samtang gisusi ni Bulanto ang mga bungangkahoy sa iyang banika ning buntaga, nabati niya ang nagkadaiyang tingog sa kalanggaman nga daw nagmaya sa pagkakita kaniya.

Ang banika ni Bulanto mao na lamang ang luna nga adunay nahabiling mga kahoy nga nagtuybo nga gihimong pinuy-anan sa kalanggaman.

Sa iyang banika na lamang makita ang mga siloy, tamsi, panaguto, tagmaya, purokpurok, pukpok, antulihaw, punay, tukmo, alimukon ug manatad. Kanunay niyang badlungon kon dunay manirador sa mga langgam sa iyang banika.

Unya, nahalingi si Bulanto sa singgit sa mga bata nga nagsingabot sa iyang nahimutangan.  Kauban ni Antoy, iyang manghod nga lalake, ang lima niya ka mga klasmeyt sa Grade-Six.

 “Yahoooo! Manoy Bulanto, ania na kami, nga motan-aw sa kalanggaman sa atong banika!” nagpaninggit si Antoy nga nagkawaykaway sa iyang mga kamot uban sa lima niya ka mga klasmeyt. Si Antoy mao ang badibadi ni Bulanto sa tanan niyang gimbuhaton sa balay ug sa banika, sukad sila mailo sa mag-uuma nilang mga ginikanan. Grade-Six na si Antoy sa pagkakaron sa edad nga 12. Si Bulanto, mitungtong na sa edad nga 22.

“Wow! Katahom sa mga langgam nga naglupadlupad! Kananoy sa ilang mga tingog ug awit!” nagdungan pagsinggit ang lima ka klasmeyt ni Antoy nga nalingaw paglantaw sa kalanggaman.

“Gawas nga makita ninyo ang lainlaing kalanggaman, malingaw sab kamo karon sa pagpamupo sa mga hinog nga bunga sa kaymito ug mangga!” nagpahiyom si Bulanto nga misenyas sa mga bata.

“Manoy, duna mi surpresa nimo nga moabot karon, nga motan-aw sab sa kalanggaman...!” ni Antoy nga mikihat sa iyang magulang ug mitudlo sa unahan.

Ug maoy nalantawan ni Bulanto sa unahan nga nagdangadanga si Mam Susan nga nagkawaykaway sa iyang kamot, ang guwapang dalagang maestra nga adviser ni Antoy sa Grade-Six ug gitupo sa iyang manghod kaniya nga pangulitawhan.

Sama sa tingog sa kalanggaman, may laing tingog usab nga misibaw karon sa kasingkasing ni Bulanto, nga mibalos sa pagkawaykaway sa iyang kamot ngadto kang Mam Susan, nga mapahiyumon nga nagpaingon na sa iyang nahimutangan. (Kataposan)