Kiriwan

“Di gyud kakompiyansahan atong mga bisita, no? Mopahimulos gyud sa tong kabisi”, ni Maricor ngadto sa iyang kapikas nga si Nilo. Nagmaneho si Nilo sa ilang kotse padulong sa Sogod. Alas diyes na ron sa gabii. Disyembre 20. Gikan sila sa usa ka mall diin gisaulog ang ikaduhang adlaw’ng natawhan sa  ilang apo nga si Sophia. Imbitado tanang paryente ug higala nga dunay anak katalirungan ni Sophia.

“Unsay buot nimong ipasabot?” ni Nilo. “Nawala akong bag nga imported. Ako untang iregalo sa akong suod nga higala”, ni Maricor. “Imong gipasabot nga gikawat?” ni Nilo. “O. Kay wa na man didto sa akong gibutangan sa atong lawak. Daghan bayang nihigda sa ato adtong petsa 11, Domingo, sa birthday nimo”, ni Maricor. “Ayaw lang sab pamasangil dayon. Kay limtanon ra ba ka. Basi’g nabalhin nimo’g butang,” ni Nilo.

Nakasabot si Nilo sa iyang kapikas. Kay may igsuon man god si Nilo nga kiriwan. Unya dagko na’g anak. Posible usa sa anak ang nikuha sa bag. Sa petsa 11 sa Disyembre, bongga ang hikay nila sa ilang balay. Kay ika-60 nga adlaw’ng natawhan ni Nilo. Senior citizen na siya. Imbitado tanang paryente ug higala.

“Kaibgan man to’g babaye akong bag”, ni Maricor. “Hinoon moentra gyud ang kaliwat o dugo sa  pagkakiriwan”, ni Nilo. “Naukay nako tanang suok sa lawak. Nalibot nako tibuok balay sa pagpinangita sa bag. Wa gyud nako hikit-i,” ni Maricar. “Kalimti na lang tos buot,” ni Nilo. “Hmpphhh!” nagpamente si Maricor.

Alas 12:00 sa tungang gabii pag-abot nila sa ilang balay sa barangay Bagatayam.

Pagkasunod adlaw, alas siyete sa buntag, nahiuli si Nilo gikang nag-hike. Mapahiyomon na si Maricor. Nakit-an na ang bag nga giingon niyang nawala. “Diin ra man diay?” ni Nilo. “Natabunan og unlan sa ilawom sa katre. Naa gyu’y mangomedya sa atong balay”, ni Maricor. “Igong hinungdan nga dili ka angay mamasangil dayon. Kay makasala na hinuon ka”, ni Nilo. Namid-ok si Maricor. “Mamahaw na hinuon ta. Andam nang lamesa”, ni Maricor. Nitangka sila.