Kahigwaos

Lunes alas sayis sa buntag nakadungog si Nelson og  mga tunob sa karsada nga naglugsong padulong sa iyang tindahan samtang nagpalansad sa iyang manok hiniktan.

Nagduda siya nga si Rudy na ang moagi. Kada adlaw siya mag-hike basta di lang mag-ulan. Nipahipi si Nelson sa bungbong sa tindahan niya nga sarisari. Di siya gustong mopakita sa higala. Mahadlok sia'g sukmatan. Kay wa siya nitambong sa imbitasyon ni Rudy. Nagsaulog sa ika-60 nga adlaw'ng natawhan. Way ikarason si Nelson. Kay gipugngan sa barkada.

Nagkaduol na ang tunob. Gilili ni Nelson sa kanto sa bongbong. Mao g yud hinooy nisugat sa iyang panan-aw si Rudy nga nagtan-aw gyud niya. Duha ka dupa na ang gilay-on. "Bay Nels. Maayong buntag, bay" ni Rudy. Nagpahiyom. Nakapanglab-ok sa laway si Nelson.

Ulitawong guwang si Nelson. 61 nay edad. Gihikayan siya'g dako sa iyang igsuon pag-edad niya'g 60. Giimbitar niya si Rudy ug nitambong gyud. Dihang si Rudy niimbitar niya, wa siya katambong.

Usa ka CPA si Rudy. Hingamigo sa mga hingamigo sab. "Maayong buntag bay Rud. Ikaw man diay," ni Nelson nga nikanga. "Bay, Pasensiya na nga wa ko kaadto sa imong birthday. Nakainom lagi ko's buwangan, lawom nang gabii ko kamata" ni Nelson. Namakak.

"Ok ra oy. Way problema nako bay. Enjoy ra gihapon ko sa akong birthday.  Pero mas enjoy kun niadto ka pa," ni Rudy. Niurong. Nilingi ngadtong Nelson. "Sorry gyud kaayo, bay," ni Nelson. Niduol sa higala. Nigunit sa kamot sa naulahi. Naseryoso sab ang nawong ni Rudy. "Abi nimo bay, dili tanan nakong higala akong giimbitar. Ikaw, kay giimbitar tika, giila tika nga importante nga higala. Pasidungog nako nimo ang akong pag-imbitar. Gihatagan tika og importansiya. Apan way pinugsanay. Naa nimo gihapon ang katungod ug kagawasan paghukom kun motambong ba ka o dili. Kun hukom nimo dili, girespeto nako imong hukom. Dili na igong hinungdan nga makaguba sa relasyon natong managhigala," ni Rudy. Nagpahiyom. "Salamat bay kun mao kana," ni Nelson. Nisamot iyang kaulaw. Niyango pagtalikod sa higala. (Kataposan)