Kilomkilom sa damgo

Bug-at ang akong mga tunob nga mibaktas

Sa wanang sa kapakyas. Imong gigisi ang kasingkasing

Ko dihang may lain nang mga ngabil ang gimahal mo.

Ang kakutas sa akong pagbaktas misamot pagdilaab

Taliwala sa nagbangotan kong mga luha. Gikutlo mo

Giputol mo ang bugtong bulak, gikuniskunis ang iyang

Pungango nga unta kadto mao may larawan sa tim-os

Kong paghigugma. Kasakit, kasakit gyod

Nga ingon sa dili ko na maantos...

Apan may mga bituon nga nagpadayon sa ilang

Pagbusilak, nagpadayon sa ilang paggilak daw

Ang gilak sa mga luhang mibanaw ibabaw ning

Bungtod nga naghambin og kamingaw, apan ay,

Nabulasot lamang kining mga tiil sa hulma sa way

Kaluoy mong kasingkasing.

Karon, ania ako naglakaw

Gihapon nga sulod na ning mangitngit kong kilomkilom

Ug igo na lang naminaw sa mga daghong o pait nga

Sonata sa maluibon mong gugma. Ug ako naghilak

Naghilak, naghilak, naghilak, naghilak, naghilak

Kuyog sa mga dahong layang nangatagak...

#Hugot

Nahigugma ka na ba? Nagpuyo ka ba sulod sa usa ka matam-is nga relasyon? Napukan ba ang imong paghigugma? Giluiban ka? Gibiyaan?  Nagmaoy ka ba? Mibalik ba ang binuhat nga nagpapitik sa imong kasingkasing? Puno ka ba sa inspirasyon? Gikilig? Bisan unsa pa man ang imong gibati karon, angayan nimo ka na nga ipabuhagay pinaagi sa pagbalak!

Ug sa dili madugay, ang inyong kinaham nga Banat News Kalandrakas, mumantala na nianang maong BALAK nga namugna gumikan sa kalipay ug kasakit nga nasinati human ka nahigugma, gihigugma ug buot mahigugma.

Ipadayag ang imong HUGOT sa gugma! Ipadala   pinaagi sa pag-like sa atong Facebook Page nga: Banat News. Didto ninyo ipadala ang inyong mga HUGOT BALAK sa gugma. Mahimo sab nga pinaagi sa snail mail:

Hugot Balak

C/o Banat News  V. Gullas St., cor. D. Jakosalem St.

Barangay Santo Niño 6000,

Cebu City,  Philippines