Mastermind

Gula 133

Medyo mihangos si Kyle dihang nakita ang lalaki nga nahimong suki ni Pia sa club, ang lalaki nga mao say ilang nakita ni Pia didto sa ilang resort. Kalmadong gidawat ni Senora Conchita ang yawe sa awto ug mimando sa hamtong nga lalaki nga mubiya na.

"Kadiyot lang.." si Kyle nga mipugong sa nagpalayo nga lalaki mihunong kini ug milingi sa nagtawag. Si Kyle usab daling miduol sa lalaki dayong sumbag niini maayong pagka-intimano sa apapangig niini wala pa matagbaw si Kyle giusban niya kini sa pagkulata dayon pagkatumba sa maong lalaki.

"Kyle unsa ba? Husto na kana?" sa senyora nga mipugong kang Kyle nga misikad ngadto sa lalaki. Wala lang musukol ang maong hamtong nga lalaki buot hunahunaon way bawot si Kyle sa maong lalaki kay bisan og hamtong na kini apan maskulado. Tingali wala lang mosukol ang maong lalaki kay apo man sa usa sa labing adunahan sa Sugbo ang misumbag ug mipatid kaniya kay kun lain pa siguro to tingali sa usa lang ka pagsuntok mawad-an kini'g panimuot. Gimanduan ang maong hamtong nga lalaki sa pagbiya dayon tuod man daling mibarog ug migawas sa mansiyon nabati pa ni Kyle nga may awto nga mipalayo gikan sa mansiyon. Sa huna-huna ni Kyle nga ang hamtong nga lalaki kadto "naunsa ka man Kyle? Grabe na ang imong kabayolente," matud pa sa senyora.

"Dili ko maingon niini kun dili pa tungod ini niya!. Karon tubaga ang akong pangutana lola kinsa kadtong lalaki? Sabton ko ba nga sinugo mo kadto? Gibayran mo aron sundan si Pia? Magpaka-aron-ingnon nga adunahan? Maniubra nimo ang tanan, lola?" ni Kyle nga nakahilak tungod sa kalagot ug ingon sa dili hisabtang pagbati.

"Lola sultihi na lang na siya sa tinuod total nakita na man to niya ang imong sinugo," matud pa ni Diane.

"Oo Kyle, binayran ko kadtong tawhana gibuhat nako ni aron lang isalbar ka kay nahuna-huna nako hinay-hinay kang gibira sa prostitute mong hinigugma ngadto sa dapit nga iyang adtuan ang empiyerno," matud pa sa senyora.

"Sa imong gibuhat nako lola nagtuo ka nga mibira ka nako paingon sa langit? Nasayop ka kay sa imong gibuhat nako ug ni Pia imo kong gitulod paingon sa empiyerno!" ni Kyle nga mitaas ang tingog.

"Wow, kun makapaninghag ni lola, wagas!! sagpaa’g usab lola," ni Diane pa. Milingi si Kyle kang Diane, nagpangagot ang ngipon dayong atake ngadto sa manghud.

"Ikaw ang nagdala’g gubot sa akong kinabuhi tungod nimo hapit ko mamatay. Tungod ninyo, gibuwagan ko ni Pia ug maoy hinungdan nga nadisgrasya ko. Ikaw ang hinungdan. Umm." si Kyle nga mituok kang Diane. Milugnot ang babaye apan nabuhian ni Kyle si Diane.

Poookkk!!! Paghagtok sa ulo ni Kyle kay gipospos ang dalang baston  sa senyora ngadto sa ulo ni Kyle. "Nagkasalbahis kana gyud mopatay ka'g igsoon tungod sa way hinungdang babaye?" Sa senyora pa nagpanghikap si Kyle sa ulo sakit ang maong paghapak sa senyora sa baston niini. Apan dili kaayo kusog mimando ang senyora nga magpalayo sa dapit busa migawas ang dalaga. Mipauli sa ila samtang nagpabilin si Kyle sa mansiyon.

Nasayran ni Kyle ang tanang gibuhat sa iyang lola nga pagmaniubra nga magkalagyo sila si Pia. Lakip na ang pagtawag niadtong kaadlawon nga nanawag kaniya ang senyora human mibiya sa ilang resort ug nakita didto ang sinugo niini. Gipahibawo niadtong hamtong nga lalaki ang senyora kalabot sa pagkakita nila ni Kyle nga tua kini sa resort. Ug ang gikasulti sa telepono didto sa resort mao usab ang senyora. Samtang sangko sa langit ang iyang kalagot kang Diane nga maoy nahimong ugat sa tanan.

"Kun dili ka gustong adunay dautang mahitabo nianang Pia palay-i siya Kyle ayaw pagmagahi sa imong ulo. Nahibawo kana kun unsay akong mabuhat andam kong mobayad aron mahanaw sa hingpit kanang Pia!" matud pa sa senyora. (Sumpayan)