Imburnal

Alas tres sa hapon sa labong nga katubhan nga gihup-an ni Felix uban sa hepe sa kapolisan sa lungsod ug sa laing lima ka mga polis nga armado og kalibre .45, maoy nabantang sa ilang panan-aw ang upat ka mga tawo misulod na sa dakong baba sa imburnal ug mipaingon sa ilawom nga bahin.

"Mao na kana sila Tsip! Ang tulo ka mga drug pusher ug drug supplier nga gikan sa siyudad!" ni Felix nga mikihat sa hepe sa mga polis.

"Kaila ka nila Kap Felix?" sa hepe sa kapolisan nga milingi kang Felix. Si Felix mao ang barangay kapitan sa ilang baryo nga maoy nangunay pagkontak sa mga polis sa lungsod, aron sa pagsikop sa mga drug pusher ug drug supplier nga naglihok sa iyang baryo, sa kasikbit nga mga baryo ug lahos na sa lungsod.

"Kaila ko nila, Tsip! Sila si Joel, Naldo ug Arnold, mao ang akong mga barangay tanod nga drug pusher diay. Kanang usa mao si Norman nga taga siyudad ug maoy supplier og shabu ug pantalya lang ang negosyo."

"Nagbantay na sab ang laing lima ko ka mga sakop sa polis, didto sa pikas baba sa imburnal Kap Felix! Naghulat na lang sila sa tawag ko's radyo ug dungan ming mosulod sa matag baba nga lutsanan sa imburnal!" sa hepe sa mga polis  nga mitawag ug miradyo na sa laing lima niya ka mga sakop nga polis  didto sa pikas baba nga lutsanan sa imburnal.

"Maayo nuon, Tsip! Aron seguro na ninyong masikop o mapatay ba nuon kun mosukol ang mga tigpayuhot ug supplier og shabu, nga mga dangan sa katilingban!" Igo lang nga ginuntan ni Felix ang hepe sa kapolisan nga misulod na sa baba sa imburnal uban sa lima niya ka mga sakop nga naggunit na sa ilang mga kalibre .45. Mahinamon siyang   nagpaabot sa sunod nga mahitabo sa sulod sa imburnal niadtong orasa. (Kataposan)