Gilutos ni Dolfo ang kumare niyang ungo

Nakapalit og bag-ong balay sila si Dolfo ug Tanya. Kining maong balay gipanag-iya sa usa ka datong alahero nga si Benigno.

Mingaw ang maong dapit apan may silingan sila nga biyuda nga ginganlang Zosima nga ilang nasuod ug maoy gipakugos nila sa ilang kamaguwangan nga anak.

Wala mahibawo si Tanya nga si Zosima diay anak sa usa ka banggiitang mangtas nga si Claudia nga taga sityo Humok-Ilong ug namatay kay napusilan.

Usa ka gabii niana, "Hoy, Tanya, naunsa ka, nga nagtuwad man ka diha sa atong abohan?" mitaas ang tingog ni Dolfo. "Mora ka mag ungo nga bag-ong natakdan..."

"Ahh...Dolfo, unsaon na man nako ini ron, ungo na man ko," ni Tanya nga namulong samtang nagtuwad. "Ganahan gyod kong motuwad uy ahhhh...."

"Ayaw og tinonto diha, ha, Tanya. Mora'g dili na maayo nga komedya da. Ungo god tawon, sayonan ka lang ana nga mahimo kang ungo. Ayaw pagbinuang og sulti diha..." mitutok si Dolfo sa iyang asawa nga nagpadayong nagtuwad.

"Gipatakdan kong mare Zosima, Dolfo. May gipakaon siya nakong usa ka adobong atay. Paghuman nako'g kaon, migaan ang akong lawas ug gusto na kong motuwad ug molupad, haaaa..." mingulob si Tanya.

Sa kalagot ni Dolfo gikuha niya ang iyang pinuti ug giadto si Zosima. Gisinggitan dayon niya kini. "Hoy, mare Zosimaaa ...ungo ka man diay ug imong gipatakdan si Tanya! Dili gani nimo paulian  ang akong asawa patyon tika. Tagudtaguron tika ning dala kong pinuti ug akong isugba ang mga unod ug ipakaon sa mga baboy...!"

Midali’g kanaog si Zosima nga nagdalag gamay'ng bag ug midagan apan gigukod siya ni Dolfo nga nagwarawara sa hait nga pinuti ug dihang hapit hiapsi si Zosima ni Dolfo, namulong kini nga mihunong, "Sige, sige, Pre, ayaw lang ko patya. Adtoon nako si Mare Tanya sa inyohang balay ug akong paulian. Ayaw lang ko’g tigbasa, ha, Pare Dolfo..."

"Tuod, gituthoan lang ni Zosima ang tangkugo ni Tanya ug naulian kini. Wala na kini makigsuod kang Zosima. (Kataposan)