Ang sobre sa hakhak sa lubi

Mao nay gidulong ni Berto ang katapusang punoan sa lubi nga iyang sanggotan, ning hapunon niyang pagpangabis sa 20 ka punoan niyang sanggotan.

Gawas sa parsela niyang uma sa banika, ang pagpananggot maoy bangkelyang panginabuhian ni Berto uban sa iyang 7 anyos nga bugtong anak lalake nga si Totoy nga nailo na sa iyang inahan. Namatay ang asawa ni Berto nga si Bebe, sa dihang naputlan kini'g lumawig sa pagpanganak kang Totoy. Nag-Grade One na si Totoy nga naanad lang sab sa ilang kakabos. Nanaginting karon sa kaisipan ni Berto ang ilang panagsulti ni Totoy kagahapon.

"Pa, ang akong mga klasmeyt, mangadto sa siyudad ugmang adlawa kay Pistas Senyor kuno ug Sinulog pa gayud! Alegre diay ang pista ni Senyor Santo Niño, Pa? Sadya diay ang Sinulog sa kadalanan, Pa...?"

"Sagdi lang anak! Basin makakuwarta ta ugma! Kaluy-an diay ni Senyor Santo Niño nga dili motukod ang akong tuba ug mahalinan ta'g 10 ka galon, para pamilite nato sa siyudad ugma...!" "Kanunay baya kong ampo ni Senyor Santo Niño, P a, diha sa gamay natong altar, nga hatagan ta niya'g kuwarta aron kapamista ug makasaksi ta’s Sinulog sa siyudad....!"

Nahasiga ang mga mata ni Berto. Maoy nasugat sa iyang panan-aw ang usa ka gamay'ng kape nga sobre nga gibutang sa primerong hakhak sa lubi sa katapusang punoan nga sanggotan nga iyang abisan ning hapona. Abtik nga gikuha ni Berto ang kapeng sobre nga bagal ang sulod.

Giablihan niya ang sobre. Samot nga milurat ang mga mata ni Berto. Tuskig kaayo sa mga papel-de-bangko ang sulod sa sobre nga tibuok tagsa-kalibo ka pesos. Iyang giihap. Sus, 20 ka buok! Bayente mil pesos!

Sa tumang kahinangop, wala na tiwasa pagpangabis ni Berto ang katapusang punoang lubi sa iyang sanggotan. Malipayon siyang mipauli sa balay ug gigakos si Totoy nga nahibulong.

"Toy! Ugma sa buntag, atol sa Pista Senyor, mangadlawon ta'g adto sa siyudad. Mohalok tas imahen ni Senyor Niño ug mosaksi ta sa Sinulog Festival....!" (Kataposan)