MGA EBA SA PARAISO - Gula 18

Nalimot kang Mira?..mao na kay ang imong hunahuna tua na man naka- focus kang Marissa. Si Mira gud nga working student diri sa university nga na-assign sa accounting," matud pa ni Vincent.

"Aw,  si Mira diay, " matud pa ni Carlo.

"Dugay na kaayo nang naibog nimo wala gyud tawon nimo pansina. Pagkahibawo niya nga kuyog ka dali kaayong nakaingon nga mokuyog pud siya," pulong pa ni Vincent.

"Ahhh, mura man og sigurado mong mokuyog ko," mapahiyomong pulong ni Carlo. "Dili mahitabo mobalibad ka kun dunay sabot ang grupo," matud pa ni Vincent.

"Asa gani ta mag-outing?" pangutana ni Carlo.

'Ahh! mao pa gani ang akong pagsulti nga sa Lapu-Lapu," tubag ni Vincent.

"Mao ba? Unya kuyog si Mira?" Matud pa ni Carlo nga ang panan-aw tua sa unahan mura’g wala sa hunahuna ang gisulti.

"Balik-balik?" Ni Vincent pa nakabantay ang higala nga may gilantaw sa unahan si Carlo. Mao diay nga ingon og wala sa huna-huna si Carlo nga nakigsulti kang Vincent nga tua ang mga mata ug attention sa  iyang nakita. Si Marissa nga kuyog si Larry. Nakaingon si Carlo sa iyang hunahuna nga mibalik na diay sa pag- eskwela si Larry human niya kini gikulata. Gibati'g selos si Carlo sa nakita. Nakapangutana nga nahimo na diay silang suod nga unta may kalagot man ang babaye kang Larry human dasmagi nga morag wala lang makakita og tawo. Wala makasabot si Carlo sa iyang gibati. Samtang si Vincent usab nagbalhin-balhin ang panan-aw kang Carlo ngadto usab sa duha ka binuhat nga nagkuyog. Human mawala sa panan-aw ni Carlo sila si Larry ug Marissa, wala’y nahimo ang ulitawo kutob na lang kini sa pagpangagho nga may dalang kalagot.

"Eseee... selos to highest level?" matud pa ni Vincent. Wala’y laing gikatubag si Carlo gawas sa pagpanghupaw na sab ug gisundan pa kini og bug-at nga pagpangagho.

"Yuna pa abi ba nako og wala makaeskwela si Larry, naa man lagi diay na?" pangutana ni Carlo. Mao man guy pulong sa atong mga classmates ako pa nimo, kalimtan na lang na nimo si Marissa oy. Sa kadaghang babaye nga nakagusto nimo nganong magsige ka pa man og gukod kang Marissa? Kalimti siya oy. Naunsa baya intawon ka!" matud pa ni Vincent.

"Inom ta." Pagpanghagad ni Carlo kang Vincent.

"Exam nato ugma oy. Kinahanglan tang magtoon," pulong pa ni Vincent.

"Usa lang gud ka botelya," pagpamugos pa ni Carlo.

"Dili lagi pwede kinahanglan kong mamawi kay pwerti ra ba nakong gamaya'g kuha sa mga quizzes nato," pagbalibad ni Vincent. Unya way tingog-tingog si Carlo nga mibiya sa nahimutangan ni Vincent.  "Hoy, part. Asa ka oy mamiya man ka’g buhi? Asa ka oy may klase pa ta." Matud pa ni Vincent ngadto  kang Carlo nga nagpadayon sa paglakaw paingon sa gawas sa campus. "Nah, nawala sa mood akong amigo wa nay planong mosulod sa klase. Hahayy gugma!" Pagpanghupaw ni Vincent ug mitekang aron pag-adto sa ilang classroom ug mosulod na sa klase.

Naglakaw si Carlo taliwala sa kainit sa adlaw sa siyudad diin mabati ang kagahob sa sakyanan mga busina ug uban pang tingog sa behikolo. Ingon og way nakita sa dapit diin busy ang mga tawo nga nag-iyahay sa pagpanglakaw nga nagdali ug nag-apas sa oras. Ang hunahuna sa ulitawo tua kang Marissa, nakapangutana kun nganong sa tanang lalaki sa campus si Larry pa man ang gihimong suod sa dalaga. Selos kalagot ug kasagmuyo ang gibati ni Carlo. Naghunahuna kun unsay maayong buhaton aron buwagon ug putlon ang kasuod sa duha. Dili siya makatugot nga ang nahimo niyang mortal nga kaaway mamahimong suod sa babaye nga iyang gihigugma. Labaw nang dili siya makatugot nga muabot sa punto nga sila si Larry ug Marissa magkauyab. Kana ang dili niya buot nga mahitabo. Samtang naghunahuna sa maayong buhaton milabang si Carlo, apan nakugang kini kay nabati niya ang sipa kaayong busina sa sakyanan nga milabay sa iyang kilid pipila lang ka pulgada ang gilay-on sa maong sakyanan nga milabay kaniya. Hapit kini madasmagi. Mihunong ang maong sakyanan sa unahan samtang si Carlo nagsagol ang gibati kakuyaw, kakugang ug kapungot apan mas naglabi ang kapungot sa driver sa maong sakyanan.

Usa kini ka taxi nga wala’y pasahero. Miabli ang windshield sa maong taxi ug miguho ang ulo sa driver. Samtang si Carlo, nagpangagot ug daling mitikang paingon sa driver. (Sumpayan)