Mga eba sa paraiso

Gula 6

Paaaakkkk!  " Agay!", pagtuaw ni Carlo nga gisakitan. Maayong pagkahaklap sa eraser sa nawong ni Carlo. Na-alimungawan si Carlo, nag- imagine na sab diay siya sa iyang crush nga si Marissa samtang ang nawong ug mga mata tua punting kang Marissa. Mao gyu’y nakita ni Carlo nga ang tanang estudyante naa magtan-aw niya.

Hasta si Marissa, nagtan-aw niya. Medyo mibatig kasakit si Carlo sa pagdapat sa eraser sa iyang aping, nagkaputi kini agi sa chalk kay ginamit na man diay ang eraser sa pag-erase sa chalk nga gisuwat diha sa blackboard. Nagpanghapyod sa iyang aping si Carlo.

"Gipatubag tika sa pangutana, pero mora lang ka’g wala Carlo, what happened to you?" matud pa sa ilang maestra nga miisa na ang tingog.

"Nag-imagine sa iyang ultimate crush nga si Marissa!", matud pa sa usa sa iyang classmates dayon milanog ang katawa sa iyang mga classmates.

Nasayud ang tanan nga crush gyud kaayo niya si Marissa. Nakita niya si Marissa nga nangislo. Wala makauyon sa nabati. Morag kahambaton siya og tawo.

"Unsa tong imong pangutana mam?" , matud pa ni Carlo.

"Naunsa man ka Carlo? Permi na man lang kang wala sa hunahuna, may problema ka ba sa inyo?" , pangutana pa sa ilang maestra.

"Iyang problema ma'am kun kanus-a siya sugton ni Marissa" matud pa sa usa niya ka classmate nga medyo may pagkabugal-bugalon, mipadayon pa kini pag-ingon, "igu na lang intawon na siyang mag-imagine kay busted man siyang Marissa ma'am"

"Shut up, Vincent!" pagbadlong pa sa ilang maestra kang Vincent nga mibugal-bugal kang Carlo. Nawala sa maayong mood si Marissa... nagmug-ot na kini kay naulaw.  Sa hunahuna ni Carlo, mas mosamot nga dili na gyud siya sugton ni Marissa.

May paglaum pa kaha siya sa babaye? Makasulay pa kaha siya paghawok sa pinkish nga aping ni Marissa? Maka-kiss sa daw perming nagbasa nga pulang ngabil sa babaye? Pagpanghupaw na lang ang gitubag ni Carlo. Mikawot sa iyang ulo bisag way katol.

"Barog, Carlo." Pagdemanda pa sa ilang maestra. Ang pobreng Carlo, mibarog. Gipangutana sa maestra mahitungod sa ilang leksiyon pero sa makausa pa mikawot na sab sa ulo nga dili katol, nagpasabot nga wa'y ikatubag ang batan-ong si Carlo. Balig tulo ka minutong mibarog si Carlo samtang ang maestra ug ang ubang estudyante naghuwat sa tubag ni Carlo sa pangutana sa ilang maestra. Tungod kay gipul-an sa pagpinaabot ang maestra ug sa samang higayon nalooy kay wa man gyu’y ikatubag si Carlo, gipalingkud na lang kinig pagbalik sa iyang lingkuranan. Nanghupaw ug gipaningot si Carlo, singot nga bugnaw.

Wala makasabot sa gibati, naulaw siya sa nahitabo. Labaw na siyang naulaw kang Marissa nga iyang crush.

Usa ka oras nga break gikan sa ilang subjects, nagpaabot sa laing subject. Ang ubang estudyante, nag-iyahay pag-adto sa school grounds diin adunay uban nag-iyahay og tapok. Si Marissa usab nag-inusara sa may bench nga gipahimutang daplin sa ground, nagkupot sa iyang libro, gipakli ang mga pahina. Nakurat ang babaye nga may mitapad niya sa paglingkud. Paglingi pa niya, si Carlo.

"Naa na sad ka, magsamok-samok nako?",  pagminaldita na sab ni Marissa kang Carlo.

"Sorry na Maris. Please." Pakilooy pa ni Carlo kang Marissa.

"Sorry sa imong mata. Ayaw na sige’g paduol nako bi. Makaguba ka sa akong adlaw dah. Naulaw kaayo ko sa imong gibuhat ganiha h!" Matud pa ni marissa nga padayon nga nagminaldita.

"Gusto ra man kong makig-friend nimo Maris." Pag pa-opoy-opoy pa sa batan-ong Carlo.

"Unya kay ako, dili man. Pahawa diha ba. Dili gani ka mohawa diha ron. Ibunal ko man ning libro sa imong ulo!" Matud pa ni Marissa ug gibakyaw ang librong gigunitan. (Sumpayan)