Daman Sa Udtong Tutok

Gula 41

Malipayon ako sa akong pagpakigrelasyon kang Jack. Buotan man gud siya. Duol usab kaniya ang akong anak. Malingaw kaayo si Ava sa higayon nga makigdula siya ngadto niini.

Sa adlaw'ng Domingo, manimba kami si Jack. Ikuyog namo ang akong anak. Akong namatikdan nga responsable ug buotan si Jack. Kasaligan siya nga pagka lalaki. Komportable ako nga makig-uban kaniya.

Usa ka higayon niana, mihagad si Jack kanako nga magpakasal na kami. "Di pa mahimo," matud ko.

"Ngano man?" nangutana siya.

"Wa pa man ko magdisi-otso," matud nako nga mipasabot kaniya. Inigka disi-otso nako, masayran mo ang akong hukom."

"Sige," niya pa.

"Tuod man, atol sa akong ikanapulog walo nga sumad sa akong adlaw'ng natawhan, gisukna ako ni Jack kun nakadesisyon na ba ako mahitungod sa iyang gitanyag kanako nga magpakasal na kami.

"Nakaseguro ka na ba gyud nga andam ka nang magpakasal nako?" Gipangutana ko siya. "Tingali bayag magmahay ka sa kapulihay." "Dili kana mahitabo, Darlene," ni Jack pa. "Gihigugma ko ikaw."

Nasuta ko nga tinud-anay ang paghagad ni Jack kanako nga magpakasal na kami mao nga gisanong ko siya. Total, nakaseguro na man ako nga si Jack mao na ang lalaki nga angay nakong pakaslan.

Malipayon kaayo kami ni Jack sa among kasal. Daghang nanambong sa among kasal, kadaghanan mga kauban ni Jack sa trabaho.

Human sa among kasal, didto kami mopuyo sa balay sa akong mga ginikanan. Dili man gud nako kabiyaan sila si tatay Barlo ug nanay Ludy. Nagkatigulang na sila ug wala sila'y laing kauban sa balay. Walay makatabang kanila panahon sa emerhensiya.

Milabay ang kapin sa usa ka tuig. Nanganak ako sa unang bunga sa gugma namo ni Jack. Malipayon kaayo ko. Pinangga ni Jack ang among anak. Nakadugang sa akong kahinangop ang pagpangga usab ni Jack kang Ava, ang anak namo ni Rafael. Wala mausab ang iyang pagtagad ngadto ni Ava bisan natawo si Elias, ang pursoso niyang anak kanako.

Nagsabak na ako sa ikaduhang anak namo ni Jack sa dihang natangtang siya sa iyang gitrabahoan. Usa siya sa napagan sa pagpanangtang og trabahante sa kompaniya nga iyang gitrabahoan. Tungod kay wala nay pangita, nag-uma na lang siya. Nananom siya'g mga utanon sama sa batong, tawong paliya ug uban pa. -- Sumpayan pa