Tentasyon

Hapon na. Bugnaw na ang adlaw nga mitungtong sa akong bukton samtang nagkaon ako’g init nga sinugbang anduhaw pinaresan sa kan-ong mais sulod sa tindahang wala’y atop daplin sa karsada duol sa simbahan.

Hapit na mousa ka bulan nga kada Domingo sa dili pa magsugod ang misa, modumdom ko dinhi’g kaon. Kay gawas nga mamords kaayo ang tindera, kinsa mao mismo ang tag-iya, medyo nakadetik ko nga nakagusto siya nako. Gani, siya man ang mangunay pagsilbe nako. Unya, motupad pa gyud og lingkod. Seksi ra ba. Gawas nga nag-panty short lang, v-neck nga t-shirt pa gisul-ob. Ang aping sa duruha ka dughan nga milugwa daw mga mansanas sa Paraiso nga nanental. Ug ang puti, hamis niyang legs ... ambot, naunsa ba, uy! Nga iya man gyung idikit sa akoa. Naka-order gud og ahat og balbakuwa.

“Sir, nindota kaha, uy, kun kada adlaw tika makit-an. Hibawo baya ka nga akong bana adik-adik. Mas mahal pa niya ang shabu kay nako. Nalimtan niya ang obligasyon nga dapat ihatag niya sa iyang asawa panahon sa akong panginahanglan.” Nakurat ko dihang gitungtong sa tindera ang iyang palad sa akong paa. Mura na hinuon ko’g gihilantan.

“Sir,” may gihunghong siya nako. Ang tumoy sa iyang dughan midapat sa akong bukton. Daw nakuryentihan na gyud ko. Maayo gani kay ako ray kustomer sa sulod. Ang uban atua ra sa gawas. Busa, wala’y nakakita sa iyang gibuhat. Unya, nagkuha siya’g gamay’ng piraso nga papel ug may gisulat... dayong tunol niini nako -- usa ka tanyag nga makapatabisay sa laway, usa ka offer nga paborito sa mga dukirok. “Sige na, Sir, ingna ko nga puwede ka anang adlawa.” Gikusi niya’g gamay akong dughan. Ug nabati ko ang nagdilaab niyang kauhaw. Namatikdan ko ang inanay’ng pagpanghugot sa akong hukom samtang didto sa akong kahiladman nag-away ang kalig-on ug kahuyang sa akong pagkatawo.

Tubagon na unta nako ang gipamarayeg sa tindera dihang ... mibagting ang kampana sa simbahan, nagpahibalo nga hapit na magsugod ang kataposang misa sa gabii. Ingon sa kalit akong nahigmata gikan sa halawom nga pagkahinanok. Didto pa ko mahinumdom kun kinsa diay ako? Gibayaran ko ang tanan kong gikaon ug nagdaling misubay sa dalandalan paingon sa likod sa pultahan sa sakristiya sa simbahan. Ug gitrapohan ang nagkadusingot kong nawong nga nagdulong sa puting sinina nga hapit gyud mamansahi sa buling. (Kataposan)